33. The Sun
Qa·na′x̣e· skι′n·ku·ts nʼasma′łne· ι′nła·k. qake′ᵢne· skιn·ku·ts: "hułts!ιnax̣a′ła qo iłka′hak aₐʽqłsma′knιk! sakιłʼιtkι′n·e· nata′n·ιk!s." u′·sʼmeks skιn·ku·ts qake′ᵢne·: "hutsx̣ałʼι′n·e· nata′nιk!." qake′ᵢne· ι′nła·k: "u′sʼmek ka′min." qake′ᵢne· skι′n·ku·ts: "wa′ha." ta′x̣as ts!ιna′x̣e·. qa·na′x̣e· qake′ᵢne· ι′nła·k: "hιntsx̣ałhułpałna′pne·." qake′ᵢne· skι′n·ku·ts: "qa′psin?" qake′ᵢne· ι′nła·k: "neᵢ hutsyaₐqanax̣ała′ₐke·." qake′ᵢne· skι′n·ku·ts: "qa′psin?"—"ta′x̣a neᵢ hutsqaosa‵qowała′ₐne· neᵢ anłonik.łe′ιt. tsaqa′ₐne· t!ιna′m·u; at qaha′x̣am aₐʽqłsma′knιk! at qa′sx̣ₐne·." ta′x̣as łax̣a′x̣e·. qa′sx̣ₐne· ι′nła·k·. "ta′x̣a nι′nko," qake′ᵢne· ι′nła·k. ta′x̣as qayaqaha′x̣e· ι′nła·k. ta′x̣as tsukᵘa′te· skι′n·ku·ts· nʼonax̣u′n·e· neᵢ t!ιna′m·u. neᵢs qanaqayaqa′ₐne· skι′n·ku·ts. ta′x̣as ts!ιna′x̣e· skι′n·ku·ts ta′x̣as ts!ιna′kᵢne· łax̣aʼnx̣o′ᵤne· ι′nła·k. qake′ᵢne· ι′nła·k. "hułpa′łnu kaₐ huts!aₐqa′k.łeᵢs." ta′x̣as qatsx̣a′n·e· łax̣a′x̣e·. ta′x̣as tsιłmiyι′tᵢne· qake′ᵢne· skι′n·ku·ts: "u′sʼmek ka′min." qake′ᵢne· ι′nła·k: "maₐts." ta′x̣as ts!ιna′x̣e·. wι′łna·m qawunikι′tᵢne·. wałkwayι′tᵢne· ława′x̣e· skι′n·ku·ts. qake′ᵢne· aₐʽqłsma′knιk!: "saha′n·e· skι′n·ku·ts." qawunikι′t.se· qake′ᵢne· ι′nła·k: "ta′x̣a ka′min. ta′x̣a husx̣ałι‵sniłts!ιna′x̣e·." qake′ᵢne· ι′nła·k. ta′x̣as yuwaₐk!mᴇnuqka′n·e·. so′ᵤkᵘne· nata′nιk! ι′nła·k. naq!aku′pse· aₐ′ʽk!e·s skι′n·ku·ts· q!apiłaq!aku′pse· a′m·a·ks. ts!ιna′x̣e· hanłukpqa′ₐne· q!apiłʼaq!ako′ᵤne·. qa.u′px̣ₐne· qa′psins łʼι′tkin. qaosa′x̣e· aₐʽkᵢmana′me·s. qanałʼitx̣o·′mek. qahaq!aku′pse· aₐʽkᵢmana′me·s. ta′x̣as qake′ᵢne· skι′n·ku·ts: "Husukᵘiłq!o′kᵤne· neᵢ kuqa′e·p." ta′x̣as.
34. Fox and Skunk
Qana′x̣e· x̣ax̣astai′ya. qaqa′ₐne· na′k!ᵢyu. nałx̣o′ᵤne· yιtskme′e·s. qałwi′yne· kts!isa′knu. pιsx̣o′ᵤne· yιtskme′e·s. qa·na′·x̣e·. qake′ᵢne·: "łu′ᵤne· qa′psin kuo′nił x̣ax̣astai′ya." qake′ᵢne·: "qaqałʼuk!ᵘe′ʼne· kuo′nił neᵢ kałukwax̣ni′yam." ta′x̣as nʼisakᵢnu′n·e·. qanałʼuknox̣a′ʼmne· na′k!ᵢyu. qaox̣ałhałukwax̣ni′łe·k. nosanox̣unqa′ₐne· x̣ax̣astai′ya. nʼumιtskι′n·e· yιtskmeι′se·s na′k!ᵢyu. ts!ιna′x̣e· na′k!ᵢyu. ława′x̣e· x̣ax̣astai′ya. nʼu′px̣ₐne· neᵢs k!umι′tseᵢs yιtskme′e·s. nʼiła′ne. qałwi′yne· ktsx̣ałʼι′pił na′k!ᵢyu. ta′x̣as ts!ιna′x̣e· x̣ax̣astai′ya. nʼu′px̣ₐne· aₐʽkιnmi′tuks. nʼeku′łne· x̣ax̣asta′ya. nʼu′px̣ₐne· na′k!ᵢyu ya′woʼs wu′os. ta′x̣as nʼatsu′kpne·. nʼuk.łu′kᵤne· nʼitx̣o·′me·k neᵢs qałwaₐkiłwitskι′kᵢne· nʼu′px̣ₐne· na′k!ᵢyus qoʼs na′ₐtas qaosaqa′pse· neᵢs qał·ukax̣o·′mek. qałwi′yne· tsx̣ałax̣aq!u′łukp, mιtx̣na′pse· na′k!ᵢyus. ta′x̣as.
