The Book of Scottish Song/Bonnie Jeannie Gray

by William Paul and William Thom

Bonnie Jeannie Gray.

[The first and last stanzas of this popular song were written by W. Paul, Glasgow, and set to music by Richard Webster. The second stanza is an interpolation by William Thom of Inverury.]

Oh whar was ye sae late yestreen,
My bonnie Jeannie Gray?
Your mither miss'd you late at e'en,
And eke at break o' day.
Your mither look'd sae sour and sad,
Your father dull and wae,
Oh! whar was ye sae late yestreen,
My bonnie Jeannie Gray?

I've mark'd that lanely look o' thine,
My bonnie Jeannie Gray;
I've kent your kindly bosom pine,
This monie, monie day.
Ha'e hinnied words o' promise lur'd
Your guileless heart astray?
O! dinna hide your grief frae me,
My bonnie Jeannie Gray.

Dear sister, sit ye down by me,
And let nae body ken;
For I ha'e promis'd late yestreen
To wed young Jamie Glen;
The melting tear stood in his e'e,
What heart could say him nay?
As aft he vow'd, through life, I'm thine,
My bonnie Jeannie Gray.

---