Rigs o' barley (1821)/Rigs o' barley
THE RIGS O' BARLEY.
It was upon a Lammas night,
When corn rings are bonnie,
Beneath the moon's unclouded light
I hied awa to Annie:
The time flew by wi' tentless heed,
'Till 'tween the late and early;
Wi' sma' persuasion she agreed
To see me thro' the barley.
Corn rigs, and barley rigs,
And corn rigs are bonnie:
I'll ne'er forget the happy night
Amang the rigs wi' Annie.
The sky was blue, the wind was still,
The moon was shining clearlie;
I set her down wi' right gude will,
Amang the rigs o' barley:
I kent her heart was a' my ain;
I lov'd her most sincerely;
I kiss'd her o'er and o'er again
Amang the rigs o' barley.
Corn rigs, &c.
I lock'd her in my fond embrace;
Her heart was beating rarely:
My blessings on that happy place,
Amang the rigs o' barley!
But by the moon and stars so bright,
That shone that hour so clearly!
She ay shall bless that happy night
Amang the rigs o' barley!
Corn rigs, &c.
I hae been blythe wi' comrades dear;
I hae been merry drinking;
I hae been joyfu' gath'ring gear;
I hae been happy thinking:
But a' the pleasures e'er I saw,
Tho' three times doubled fairly,
That happy night was worth them a'
Amang the rigs o' barley.
Corn rigs, &c.