Bonny Scot (2)/Slighted Nancy

SLIGHTED NANCY.

Tune.—if the Kirk wad let me be.

’TIS I ha'e ſeven braw new gowns,
and ither ſeven better to mak,
And yet for a' my braw new gowns,
my wooer has turned his back;
Beſides I ha'e ſeven milk-ky,
and Sandy he has but three;
And yet for a' my good ky,
the laddie winna ha'e me.

My dadie's a delver of dykes,
my mither can card and ſpin,
And I'm a fine fodgel laſs,
and the ſiller comes linkin in,
The ſiller comes linkin in,
and it is fu' fair to ſee,
And fifty times wow! O wow,
what ails the lads at me?

When ever our Baty does bark,
then faſt to the door I rin,
To ſee gin ony young ſpark,
will light and venture but in,
But never a ane comes in,
though mony a ane gaes by,
Syne far ben the houſe I rin:
and a weary wight am I.

When I was at my firſt pray’rs,
I pray'd but anes i' the year,
I wiſh'd for a handſome young lad,
and a lad wi' muckle gear.
When I was at my neiſt pray'rs,
I pray'd but now and than,
I faſh'd na my head about gear,
if I gat a handſome young man.

Now when I was at my laſt pray’rs,
I pray'd on baith night and day,
And, O! if a beggar wad come,
with that ſame beggar I'd gae.
And O! and what'll come o' me!
and O! and what'll I do?
That ſic a braw laſſie as I
ſhou'd die for a woer I trow.