Catherine Ogie (1820)/Rantin' highlandman
THE RANTIN' HIGHLANDMAN.
Ae morn, last owk, as I gade out,
To flit a tether'd ewe and lamb,
I met (as skiffing ower the green),
A jolly rantin Highlandman;
His shape was neat, wi' features sweet,
An' ilka smile my favour wan;
I ne'er had seen as blythe a lad,
As this young rantin' Highlandman!
He said, My dear, how came ye here,
Sae early throw the fiel's to gang?
Wad ye but gae alang wi' me,
An' wed a rantin' Highlandman.
In simmer days, on flowery braes,
When frisky is the ewe and lamb,
I'se row you in my tartan plaid,
Syne be your rantin' Highlandman.
With heather bells that finely smells,
I'll deck yere hair sae fair and lang;
If ye,ll consent, to scour the bent,
Wi' me a rantin' Highlandman;
We'll big a cot, and buy a stock,
Syne do the best that e'er we can;
Then come my dear ye needna fear,
To trust a rantin' Highlandman.
Tho' Cupid's dart had struck my heart,
And fain I wad hae gi'en my han',
Yet durstna lest my mother should
Dislike a rantin' Highlandman-
But I expect that he'll be back,
Then tho' my kin should swear and ban,
I'll owre the hill, or whare he will,
Wi' my young rantin' Highlandman.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse