Fugitive Poetry. 1600–1878/The Bonnie Breist-Knots

The Bonnie Breist-Knots.

Hey the bonnie, how the bonnie,
Hey the bonnie breist-knots!
Blythe and merry were they a',
When they got on their breist-knots.
There was a bridal in our town,
And till't the lasses a' were boun',
Wi' monie facings on their gowns,
And some o' them had breist-knots.
Singing, hey the bonnie, &c.

At nine o'clock the lads convene,
Some clad in blue, some clad in green,
Wi' glancin' buckles on their sheen,
And flowers upon their waistcoats.
Forth came the wives, a' wi' a phrase,
And wished the lassie happy days,
And muckle thought they o' her claes,
And 'specially the breist-knots.
Singing, hey the bonnie, &c.

The bride she was baith young and fair,
Her neck outshone her pearlins rare;
A satin snood bound up her hair,
And flowers among her breist-knots.
The bridegroom gazed—but mair I ween,
He prized the glance of love's blue een,
That made him proud o' his sweet Jean,
When she got on her breist-knots.
Singing, hey the bonnie, &c.