Home, Sweet Home (1829)/Donald McDonald

DONALD M'DONALD.

My name it is Donald M'Dnnald,
I live in the Highlands sae grand;
I’ve followed our banners, and will do,
Wharever my maker has land.
Whan rankit amang the blue bannets,
Nae danger can fear me ava;
I ken that my brethren around me
Are either to conquer or fa’.
Brogues and brochen, and a’,
Brochen and brogues, and a',
And is na she very weel aff,
Wha has brogues and brochen, and a'.

Last year we were wonderfu’ canty,
Our friends and our country to see;
But since the proud Corsican’s vauntie,
We'll meet him by land or by sea.
Whanever a clan is disloyal,
Wharever our king has a foe,

He’ll quickly see Donald M'Donald,
Wi’ his Highlandmen a' in a row.
Guns and pistols, and a’,
Pistols and guns, and a’.
He’ll quickly see Donald M'Donald,
Wi guns and pistols, and a’.

What tho’ we befriendit young Charlie,
To tell it I dinna think shame,
Poor lad, he came to us but barely,
And reckoned our mountains his hame.
Its true that our reason forbade us,
But tenderness carried the day:
Had Geordie come friendless amang us,
Wi’ him we had a’ gane awa’.
Sword and buckler, and a’;
Buckler and sword, and a'
For George we’ll encounter the devil,
Wi sword and buckler, and a’.

And oh! I would earnestly press him,
The keys o’ the East to retain;
For should he gie up the possession,
We’d soon hae to force them again;
Than yield up na inch wi’ dishonour,
Tho’ it were my finishing blow,
When he may depend on M’Donald,
Wi’ his Highlandmen a’ in a row,
Knees and elbows, and a’;
Elbows and knees, and a';
Depend upon Donald M’Donald,
Wi’s knees and elbows, and a’.

If Buonaparte land at Fort William,
Auld Europe nae langer sall grane.
I laugh when I think how we’ll gall him,
Wi’ bullet, wi’ steel, and wi’ stane.
Wi’ rocks o’ the Nevis and Gairy,
We’ll rattle him aff frae our shore.
Or loll him asleep 'neath a carniey,
And sing him Lochaber no more.
Stanes and bullets, and a’,
Bullets and stanes, and a’;
We’ll finish the Corsican callan,
Wi’ stanes and bullets, and a’,

The Gordon is guile in a hurry,
The Campbell is steel to the bane,
And Grant, and M’Kenzie, and Murray,
And Cameron will hurkle to nane.
The Stuart is sturdy and wannel,
And sae is M’Leod and M'Kay,
And I, their gudebrother, M'Donald,
Shall ne’er be the last in the fray.
Brogues and brochen, and a’,
Brochen and brogues, and a’,
Sae up wi’ the bonny blue bannet,
The kilt and the feather, and a’.

FINIS.