I had a horse (1820)/Cauld kail in Aberdeen

For other versions of this work, see Cauld Kail in Aberdeen (unknown).

---

CAULD KAIL IN ABERDEEN.

There's cauld kail in Aberdeen,
And castocks in Strabogie,
Where ilka lad maun hae his lass,
But I maun hae my cogie,
But I maun hae my cogie, troth,
I canna want my cogie,
I wadna gie my three gird cog
For a' the wives in Bogie.

Johnny Smith has got a wife
Wha scrimps him o' his cogie;
But where she mine upon my life,
I'd duck her in a bogie.
For I maun hae my cogie, troth,
I canna want my cogie,
I wadna gie my three gird cog
For a' the wives in Bogie.

Twa or three todlin weans they hae,
The pride o' a' Strabogie,
Whene'er the totums cry for meat,
She cusses ay his cogie;
Crying, "Wae betide the three gird cog
"Oh, wae betide the cogie,
"It does mair skaith than a' the ills
"That happen in Strabogie.

Sho fand him ance at Willie Sharp's;
And, what they maist did laugh at,
She brake the bicker, spilt the drink,
And tightly gowff'd his hafset,
Crying, "Wae betide the three gird cog
"Oh wae betide the cogie!
"It does mair skaith than a' the ills
"that happen in Strabogie.

Yet here's to ilka honest soul,
Wha'll drink wi' me a cogie;
And for each silly whingin fool,
We'll duck him in a bogie.
For I maun hae my cogie, Sirs,
I canna want my cogie:
I wadna gie my three gird cog
For a' the queens in Bogie.