Murphy Delaney/The slighted lover

THE SLIGHTED LOVER.

Tune-“I had a horse.”

She’s jilted me, an’ now I’m free
To seek anither dearie;
But ne’er again shall onie she,
My bosom mak sae eerie.
Her skin is white—her een are blue—
But oh! she gaed wi’ Johnie;
An’ gin to me she was na true,
What is’t to me how bonnie?

What tho’ she’s fair and unco fair,
An’ comely as she’s bonnie?
I still wad look for something mair,
Than beauty in a cronie.
My mither lo’ed the lassie weel,
An’ her consent wad gie me;
But now for me she’ll get the deil
Before that she gets Jamie.

An’ tho’ I’m puir, an’ unco puir,
I think mysel’ fu’ cannie:
She’s aff te Jock out-owre the muir,
Sae I’ll awa to Nannie.
Let simple chiels tak’ tent an’ fear
-Lest they sic jades discover,
Wha wad, for sake o’ warly gear,
Slight a true-hearted lover.