My Bonnie Mary (1815-1825)/It Was Upon a Lammas Night
it was upon a lammas night.
It was upon a Lammas night,
When corn rigs are bonnie,
Beneath the moon‘s unclouded light,
I hied awa to Annie;
The time flew by wi' tentless heed,
Till 'tween the late and early:
Wi' sma' persuasion she agreed
To see me thro' the barley.
O corm rigs, an' barley rigs,
An' corn rigs are bonnie:
I'll ne'er forget that happy night,
Amang the rigs wi' Annie.
The sky was blue, the wind was still,
The moon Was shining clearly;
I sat her doon wi’ right good will,
Amang the rigs o' barley:
I kent her heart was a' ma ain,
I lo'ed her most sincerely;
I kiss'd her owre and owre again,
Amang the rigs o‘ barley,
I lock'd her in my fond embrace,
Her heart was beating rarely:
My blessings on that happy place,
Amang the rigs o' barley!
But by the moon and stars so bright,
That shone that hour so clearly!
She ay shall bless, that happy, night,
Amang the rigs o' barley.
I hae been blythe wi' comrades dear,
I hae been merry drinkin;
I hae been joyfu' gatherin gear,
I hae been happy thinkin:
But of a' the pleasures e'er I saw,
Tho' three times doubled fairly,
That happy night wAs worth them a',
Amang the rigs o' barley.