Page:Ancient history of three bonnets (NLS104184532).pdf/11

Seek my auld Bonnet aff my head!
Faith that's a bonny ane indeed!
Require a thing I'll part with never;
She's get as ſoon a lap o' my liver,
Vile whore and jade, the woody hang her.
Bard. Thus ſaid, he ſaid, nae mair for anger,
But curs'd and ban'd, and was nae far,
Frae trading Jouk amang the glar.
While Jouk with language glib as oolie,
Right pawkily kept aff a toolie,
Well maſked with a wedder's ſkin,
Although he wis a tod within.
He hum'd and ha'd, and with a cant,
Held forth, as he had been a ſaint,
And quoted texts to prove we'd better,
Part with a ſma' for a greater.
Joukum. Ah! brither, may the furies rack me
If I mean'd ill, but ye miſtak me;
But gin your Bonnet's ſic a jewel,
Pray gie't or keep it, fir, as you will,
Since your auld faſhion'd fancy rather,
Inclines till't than a hat and feather;
But I'll go try my brither Bawſy,
Poor man, he's nae ſae daft and faucy.
With empty pride to crook his mou,
And hinder his ain good like you;
If he and I agree, ne'er doubt ye,
We'll make the bargain up without ye;
Syne your braw Bonnet and your noddle
Will hardly baith be worth a bodle.
Bard. At this bauld Briſtle's colour chang'd,
He ſwore on Roſe to be reveng'd,