Page:Ancient history of three bonnets (NLS104184532).pdf/15

And if ye'll gie't your bread is baken;
But firſt accept of this love-taken;
Here tak this gowd and never want,
Enough to gar you drink and rant;
And this is but an arle penny,
To what I afterward deſign ye;
And in return I'm ſure that I,
Shall naithing ſeek that ye'll deny.
Bawſy. And troth now Jouk, and neither will I
Or after never ca' me Billy;
If I refuſe, wae light upon me,
This gowd, O vow! 'tis wonder bonny.
Joukum. Ay, that it is—'tis e'n the a'
That gars the plough of living draw.
'Tis Gowd gars ſogers feight the fiercer,
Without it preaching wad be ſcarcer;
'Tis gowd that makes the great men witty,
And puggy laſſes fair and pretty;
Without it ladies nice wad dwindle,
Down to a wife that ſnoves a ſpindle.
But to the point, and wave Digreſſion,
I make a free and plain confeſſion,
That I'm in love, and as I ſaid,
Demand from you a little aid,
To gain a bride that eithly can,
Make me fou bleſt and you a man:
Give me your Bonnet to preſent
My miſtreſs with, and your conſent,
To rive the Daft and faſhion'd deed,
That bids ye wear it on you head.
Bawſy. O goſh! O goſh! then Jouk have at her,
If that be a' 'tis nae great matter.