ðam bradan rodere on ymbhwyrfte ðære eorðan. and heora nan ne fylð of ðam fæstan rodere ða hwile ðe ðeos woruld wunað swa gehal. Eall swa gæð seo sunne and soðlice se mona abutan ðas eorðan mid bradū ymbhwyrfte eall swa feorr beneoðan. swa swa hi bufan us gað.
VIII. On ðam fiftan dæge ure drihten gesceop of wætere anum ealle fixas. on sæ and on eauum. and eall ðæt on him crypð. and ða mycelan hwalas on heora cynrynum. and eac eall fugolcynn eallswa of wætere. and forgeaf ðam fugelum flyð geond ðas lyft. and ðam fixum sund on ðam flowendum yðum. God hi gebletsode ða ðus cweðende to ðam fixum. "Weaxað and beoð gemenigfylde. and gefyllað ða sæ."[1] and eac "ða fugelas beon gemenigfylde bufan ðære eorðan." and hit gewearð ða swa. Ða fugelas soðlice ðe on flodum wuniað. syndon flaxfote.[2] be Godes foresceawunge. ðæt hi swimman magon and secan him fodan. Sume beoð lang sweorede swa swa swanas and ylfettan. ðæt hi aræcan[3] him magon mete be ðam grunde. And ða ðe be flæsce lybbað. syndon clyferfete and scearpe gebilode. ðæt hi bitan magon on sceortum swuran. and swyftran on flihte. ðæt hi gelimplice beon to heora lifes tilungum. Nis na eall fugolcynn on Engla ðeode. ne on nanum earde ne byð naht eaðe eall fugolcynn. forðam ðe hi feala syndon. mycele on wæstme and mislice fleod. swa swa us bec secgað swutollice be ðam.
IX. On ðam syxtan dæge ure drihten gecwæð "Acenne seo eorðe nu cuce[4] nytena on heora cynryne and ða creopendan wyrmas. and eall deorcynn on heora cynrynum." Hwæt ða God geworhte ðurh his wunderlican mihte eall nyten-cynn on heora cynrynum. and ða wildan deor ðe on wudum eardiað. and eall ðæt fiðerfote by of ðære foresædan eorðan. and eall wyrmcynn ða ðe creopende beoð. and ða reðan leon. ðe her on lande ne beoð. and ða swiftan tigres. and ða syllican[5] pardes. and ða egeslican beran. and ða ormætan ylpas. ða ðe on Engla ðeode acennede
