worhte God. Ælc ðing hæfð anginn and ordfruman ðurh God. buton se ana scyppend ðe ealle ðing gesceop, se næfð nan anginn ne nænne ordfruman. ac he sylf is anginn and soðlice ordfruma ealra ðinga.[1] and æfre ungeendod.
XIV. Næs hit na færlic geðoht oððe unforesceawod ræd ðæt se Ælmihtiga God ðysne middan eard gesceop. ac wæs æfre æt fruman on his ecum ræde. ðæt he wolde gewyrcan ealle ðas woruld. and ealne middan eard mid his agenre mihte him sylfum to lofe. swa swa we geseoð nu. ðæt ealle gesceafta heriað heora scyppend. butan ðam earmum mannum ðe hine forseo and hine herian nellað. ne hi his ne gymað ðæt hi mid ðam ealdan deofle endeleaslice losion. Wel wyste ure scyppend. ða ða he geworhte Adam ðone frumsceapenan mann. ðæt he syngian wolde ðurh ðæs deofles lare. swa swa he dyde syððan. and God wyste eac swylce hu he sylf smeade embe ða bote ða iú. hu he hit gebetan mihte ðurh his halgan gife ðæt he gehulpe ðam menn and eac his ofsprincge. ðam ðe on hine gelyfað and mid soðre lufe hine simble wurðiað.
XV. On ælcum lichamlicum gesceafte syndon feower ðing. "Eorðe and wæter. fyr. and lyft." Fyr is behyd on heardum stanum. se stan cymð of eorðan. and he swæt swa ðeah, and of stancludum. cumað wyll springas. Ure lichama is eorðe. and he oft ðeah swæt. and of ðam fyre hatað ðe him on wunað. and on ðam lyfte we lybbað ealle. Se mann was swa gesceapen ðæt he syngian ne dorste. and he wære gesælig gif he na ne syngode. æfre undeadlic gif he his drihtne gehyrsumode. and gif he syngode he wære ungesælig. and syððan deadlic for ðære synne fremminge. God hine ne neadode on naðre healfe. ac let hine habban his agene cyre. Næs he na geworht mid nanre wohnysse. ne mid nanum synnum gesceapen to menn. ne nane leahtras
- ↑ A parallel passage occurs in one of Ælfric's homilies: "An angin is ealra ðinga. ðæt is God Ælmihtig. He is ordfruma and ende: he is ordfruma. forði he wæs æfre; he is ende. butan ælcere geendunge. forðan ðe he bið æfre ungeendod."
