gewinn hu ðu Gode campie. and mid hwilcum gemete ðu miht him ðeowian. Gehyr ðu geornlice. and ðu ne beo gehefegod mid ðam swaran slæpe. ac awrece ðe sylfne mid mycelre geornfulnysse nu to minre spræce. Ne synd ðas word na of me ac of Godes lare. Ne ic mid niwre lare nelle læran ðe nu. ac mid ðære lare ðe ic leornode gefyrn. æt ðam halgum fæderum ðe wæron ure foregengan. Gif ðeos halige lar gelicað ðinre heortan. and gif ðu hi underfehst. ðonne færst ðu on sibbe. and nan yfel ne mæg. ne ne mot ðe genealæcean. ac ælc wiðerweardnys gewiteð fram ðinre sawle.
II. De Militia Spirituali.
Gif ðu wylle campian on Godes campdome ne campa ðu ænigum buton Gode anum. ðæt ðu him ðeowie on his ðeowdome. simle orsorh fram woruld-carum. and fram ælcum gehlyde. Ða men ðe campiað ðam eorðlican cininge hi gehyrsumiað æfre eallum his hæsum. Swa eac ða ðe campiað ðam heofenlican cininge sceolon gehyrsumian ðam heofonlicum bebodum. Se eorðlica kempa bið æfre gearo and caf. swa hwyder swa he faran sceal to gefeohte mid ðam kininge. and he for his wife. ne for his wenclum. ne dearr hine sylfne beladian ðæt he ne scule faran. Mycele swyoor sceal se soða Godes cempa buton ælcere hremminge. hraðe gehyrsumian Cristes sylfes bebodum ðæs soðfæstan kyninges. Se eorðlica kempa kampað mid his wæpnum ongean gesewenlice feond. and ðu scealt campian wið ða ungesewenlican fynd ðe ne geswicað næfre with ðe to campienne ða hwile ðe ðu cucu bist. Ðam woruldlican kempan is gewinn gesewenlice ongean flæsc and blod. and ðin gewinn is æfre ongean ða awyrgedan gastas ðe geond ðas lyft fleoð to fordonne ða unwaran. Se woruld kempa werað woruldlice wæpna ongean his geli-
