on clænnysse Criste sylfum ðeowodon. ðæt hi habban on ende ða hundfealdan mede. Se Crist sylf behet on his halgan godspelle. Đu mann ne syngast na gif ðu sylf ne behatest. ac gif ðu æne behatest ðam Ælmihtigan Gode he wyle ðonne habban ðæt du him behete. ne he nele mid nanre besmitennysse gemengan ðine halgan limu ðe him gehalgode syndon. Warna nu. min bearn ðæt ðu ne wurde beswicen. ðurh ðæs lichaman wlite. and ðu swa forleose ðinre sawle wlite ðurh ðone sceortan lust. Warna ðæt ðu ne hreppe wifmanna lichaman. swa swa fyr wyle ontendan ðæt ceaf ðæt him widliged. swa byð se ðe handlað wifhades mannes lic. Ne ætbyrst he naht eaðe buton his sawle lyre. ðeah ðe he lichamlice mid hyre ne licge. swa ðeah byð his inngehigd wið innan gewemmed.
VIII. De Sæculi Amore fugiendo.
Sege me nu min bearn hwilc geðincð mæge beon ðinre agenre sawle ðæt ðu sceole lufian ðæs lichaman wlite ðe gewyrded to duste. and eallswa forsearað. swa iscinende blostman ðe on wyrtum weaxað wynsumlice on sumera. and wurðað fornumene mid ðæs wintres cyle. Swa byð ðæs mannes wlite ðe wyrðeð eall fornumen mid onsigendre ylde. and se dead geenda ðone ærran wlite. ðonne ongitt ðin sawl ðæt ðu sylf lufodest idel. For-oft se mann gewyrðeð on ende toswollen. and to stence awended mid unwynsumnysse. ðæt him sylfum by egle. and andsæte se stenc. and his lustfullnysse him ne belifð nan ðing. and his wistfullnys him wyrðeð to biternysse. Hwær beoð ðonne ic axie ða estfullan swæsnessa. and ða liðan liffetunga ðe hine forlæddon æror. Hwær bið his gaf spræc. and ða idelan gamenunga. and his ungemetegode hleahter. Hi beod ðonne alede. and hi urnon him fram swa swa yrnende flod. and hi ne ætywdon
