This page has been validated.
7
YOUNG JOCKEY.
Young Jockey was the blithest lad
In a’ our town or here awa;
Fu’ blithe he whistled at the gaud,
Fu’ lightly danc’d he in the ha’!
He roos’d my e’en sae bonnie blue,
He roos’d my waist sae genty sma;
An’ ay my heart comes to my mou,
When ne’er a body heard or saw.
My Jockey toils upon the plain,
Thro’ wind and weet, thro’ frost and snaw;
And o’er the lea I leuk fu’ fain
When Jockey’s owsen hameward ca’.
An’ ay the night comes round again,
When in his arms he taks me a’;
An’ ay he vows he’d be my ain
As lang’s he has a breath to draw.
O KENMURE’S ON AND AWA, WILLIE.
O Kenmure’s on and awa’; Willie,
O Kenmure’s on and awa:
An’ Kenmure’s lord’s the bravest lord
That ever Callaway saw.
