GIBBY AND THE GHAIST.
CAULD was the night-bleak blew the whist-ling wind,
And frae the red nose fell the drizzlin' drap,
Whilk the numb'd fingers scantly could dight aff,
Sae dozen't wi' the drift, that thick’ning flew
In puir auld Gibby's face, and dang him blind.
Sair sair he pegh'd, and feught against the storm,
But aft forfaughen turned tail to the blast,
Lean'd him upon his rung,and tuke his breath.
Pair Bawty, whinging, crap on his lee side,
Wi's tail a-tween his feet, and shook his lugs———
Gibby's auld heart was wae for the dumb brute,
And, louting down, he hap't him wi' his plaid,
Clappit his head, and cryed "Poor fallow whisht,
And gif I'm spared to reach some biggit wa's
Ye's win as near the ingle as mysel',
And share my supper too———but we maun on———
The night grew mirker———and nae moon nor starns
We'll see the night. Sae let us face the blast,
And to a stay brae set as stout a heart."
Sae cheer'd he his poor brute, and he was cheer'd,
