Page:Gospel of Saint John in West-Saxon.djvu/69

22. Nē sē Fæder ne dēmo nānum menn, ac hē sealde ǣlcne dōm þām Suna;^[1]

23. þæt ealle ārwurþigeon þone Sunu, swā swa hig ārwurþigeaþ þone Fæder. Sē ðe ne ārwurðaþ þone Sunu, ne arwurþaþ hē þone Fæder þe hine sende.^[2]

24. Sōð ic secge ēow, þæt sē þe mīn word gehyrð, and þām gelȳfð þe mē sende, sē hæfð ēce līf, and ne cymþ æt þām dōme, ac færð fram dēaðe tō līfe.^[3]

25. Sōð ic secge ēow, Þæt sēo tīd cymð, and nū is, þonne þā dēadan gehȳrað Godes Suna stefne; and þā lybbað þe hig gehȳrað.

26. Swā sē Fæder hæfþ līf on him sylfon, swā he sealde þām Suna þæt hē hæfde līf on him syluon;^[4]

27. and sealde him anweald þæt hē mōste dēman, for ðām þe hē is mannes Sunu.

28. Ne wundrigeon gē ðæs þæt sēo tid cymð þæt ealle gehȳrað his stefne þe on byrgenum synt;^[5]

29. and þā þe gōd worhton farað on līfes ǣreste; and þā þe yfel dydon, on dōmes ǣreste.^[6]

Ðys [godspel] sceal on þūrsdag on þǣre ōðre lenctenwucan.

30. Ne mæg ic nān þing dōn fram mē sylfum;

1. A, men.
2. A, arweorðion; A, arwurðiað; A, arweorþað (last time).
3. Corp., blank space for the initial letter of Soð, A, B, C, illuminated S.
4. A, hym sylfum (twice).
5. A, wundrion.
6. A, æryste (twice).