36. Gif sē Sunu ēow alyst, gē bēoð soðlīce frīge.
37. Ic wāt þæt gē synt Abrahames bearn; ac gē sēceað mē tō ofslēanne, for þām mīn spǣc ne wunaþ on ēow.[1]
38. Ic sprece þæt þe ic mid Fæder geseah; and gē dōð þā þing þē gē mid ēowrum fæder gesāwon.[2]
39. Ðā andswarodon hig and cwǣdon tō him, Abraham is ūre fæder. Ðā cwæð sē Hǣlend tō him, Gif gē Abrahames bearn synt, wyrceað Abrahames weorc.[3]
40. Nū gē seceað mē tō ofslēanne, þone man þe ēow sǣde sōðfæstnesse, þā þe ic gehȳrde of Gode; ne dyde Abraham swā.[4]
41. Gē wyrceað ēowres fæder weorc. Hig cwǣdon witodlīce tō him, Ne synt wē of forligere acennede; we habbað ānne God tō Fæder.[5]
42. Witodlīce sē Hǣlend cwæþ tō him, Gif God wǣre ēowre Faeder, witodlīce gē lufedon mē. Ic cōm of Gode; nē cōm ic nā fram mē sylfon, ac hē mē sende.[6]
43. Hwī ne gecnāwe gē mīne sprǣce? [for þām þe gē ne magon gehȳran mīne spǣce.][7]
- ↑ A, synd; A, secað; A, for þam ðe; A, B, C, spræc.
- ↑ B, C, gesawun.
- ↑ A, andswaredon; A, synd wyrcað.
- ↑ A, secað.
- ↑ A, wyrcað; A, synd; Corp., B, C, forlire, A, forlygere.
- ↑ B, eowr (erasure after r); A, sylfum.
- ↑ Corp., A, omit for þam... spæce (homœoteleuton), B, C, for þam þe ge ne magon gehyran mine spæce.
