bewende, þa gecneow hit swiðe sweotele his agne[1] modor; wæs se Wisdom ðe hit lange ær tyde ⁊ lærde. Ac hit ongeat his lare swiðe totorenne[2] ⁊ swiðe tobrocene[3] mid dysigra hondū, ⁊ hine þa fran[4] hu ꝥ gewurðe. Ða andwyrde[5] se Wisdom hī ⁊ sædeþ his gingran hæfdon hine swa totorenne, þær þær hi teohhodon ꝥ hi hine eallne habban sceoldon; ac hi gegaderiað monifeald[6] dysig on ðære fortruwunga ⁊ on þā gilpe, butan heora hwelc eft to hyre[7] bote gecirre.
§ ii c. Ða ongan se Wisdom hreowsian for þæs Modes tydernesse, ⁊ ongan þa giddian ⁊ þus cwæð: Eala on hu grundlasum seaðe mod drigð, þon hit styrmað þisse worulde ungeþwærnessa.[8] Gif hit þōn forget his ahgen[9] leoht, ꝥ is ece gefea, ⁊ ðringð on þa frēdan þistro, ꝥ sind woruldsorga, swa swa ðis Mod nu deð, nu hit nauht elles nat butan gnornunga.
§ iii. Þa se Wisdō þa ⁊ seo Gesceadwisnes þis leoð asungen hæfdon, þa ongan he eft sprecan ⁊ cwæð to þan Mode: Ic geseo þe is nu frofres mare þearf þon unrotnesse.
§ iv. Forþā gif þu þe ofsceamian[10] wilt þines gedwolan, þon onginne ic þe sona beran ⁊ bringe mid me to heofonu. Þa andsworode him ꝥ unrote Mod ⁊ cwæð: Hwæt la hwæt, sint þis nu pa gōd[11] ⁊ þa edlean þe þu ealne weg gehete þā monnu þe þe heorsumian woldan? Is þis nu se cwide þe þu me geo sædest se wisa Plato cwæde, ꝥ wæs ꝥ nan anweald nære riht butan rihtū þeawū? Gesihst þu nu ꝥ þa rihtwisan sint laðe ⁊ forþrycte, forþā hi þinū willan woldan fulgān, ⁊ þa unryhtwisan seondan[12] up ahafene þurh heora won dæda ⁊ þurh heora selflice? Ꝥ hi ðy eð mægen heora unriht gewill forðbringan hi sind mid gifu ⁊ mid gestreonū[13] gefyrðrode. Forþā ic nu wille geornlice to Gode cleopian. Ongan ða giddien, ⁊ þus singende cwæð:
