swiðe cuðlice on psalmum, swa he hit oft acunnad hæfde, he cwæð: Elðiodige arison wið me, & wunnon wið me, & swiðe stronge wæron ða ðe min ehton. We cwædon ær ðæt Salomon cwæde ðæt mon sceolde his wætry todælan, & ðeah him self eall habban. Swelce he openlice cwæde: Eow is micel ðearf ðæt ge swa ætfeolen út ðære lare, swa swa ge eow innan ne geðieden to ðæm awiergedum gæstum ðurh úpahafenesse eowres modes, ðylæs ge ðurh ða ðenunga ðara Godes worda to eow forlæten eowre fiend, ðylæs eow ðonon awuht gemænes weorðe. Ac ðonne we doð ægðer, ge we ða wætru todælað æfter kyninga herestrætum, ge eac us selfe habbað, ðonne ðonne we swiðe wide úttogeotað ða lare, & suaðeah ðurh ða ne wilniað woruldgielpes.
XLVIV. Ðætte on oðre wisa sint to manianne ða ðe medomlice cunnon læran, & ðeah for mi(c)lum ege & for micelre eaðmodnesse forwandiað; & on oðre wisan ða ðe ðonne giet to ðæm gewintrede ne beoð ne geðiegene, & ðeah for hrædhydignesse bioð to gegripene.
On oðre wisan sint to maniane ða ðe medomlice læran magon, & ðeah for micelre eaðmodnesse him ondrædað; on oðre ða ða ðe u(n)medome bioð to ðære lare oððe for gioguðe oððe for unwisdome, & ðeah for hira fortruwodnesse & for hira hrædwilnesse beoð to gescofene. Ða ðonne sint to manigenne ðe nyttweorðlice læran meahton, & ðeah for úngemetlicre eaðmodnesse hit onscuniað, hi sint to manigenne ðæt hie be ðæm læssan ðingum ongieten hu suiðe hie gesyngiað
