scyldegena gyltas ofslogen. He cwæð: Se ðe Godes ðegn sie, ga hider to me, & do his sweord to his hype, & gáð from geate to geate ðurh midde ða ceastre, & ofslea ælc mon his broður & his freond & his nihstan. Ðæt is ðonne ðæt mon his sweord doo ofer his hype, ðæt mon ða geornfulnesse his lare læte furður ðonne his flæsces lustas, & ðæs gieme ðæt he un[a]liefede lustas & lara atemige & oferwinne, ðonne he wilnað ðæt he haligdom lære. Ðæt is ðonne ðæt mon ierne from geate to oðrum, ðæt he ierne ðreatigende from ðara unðeawa ælcum to oðrum, ðe deað mæge ingán on ðæs monnes mód. Ðæt is ðonne ðæt mon ierne ðurh mid[d]e ða ceastre, ðætte mon sua emn sie betweox cristenum folce on ðære ðreaunga hiera scylda ðæt he nauðer ne nanum men ne olicce, ne he nanes monnes oleccunga ne rec[c]e. Be ðæm wæs swiðe ryht[lice] gecweden ðæt mon scolde ofslean his broður & his freond & his niehstan, ðonne he for nanre sibbe ne wandað ðæt he ða gyltas ne wrece on scy[l]degum monnum. Nu se is ðonne gehaten Godes ðegn se ðe mid ðæm andan onæled bið godcundre lufan unðeawas to ofsleanne, hu, ne wiðsæcð se ðonne eallunga Godes ðegn to bionne, se ðe wiðsæcð ðæt he ne ðreage swa he swiðusð mæge woruldmonna unðeawas? Ongean ðæt sint to manianne ða ðe nabbað & hi ðeah forhradiað ðæt hie hit ongiennað, ðylæs hie himselfum fordikigen ðone weg ðære bote, ðe him on fierste becuman meahte, ðonne hi him to tioð ða byrðenne swa micelre ðenunge swa hrædlice. Ac ðonne hie him ær tide to tioð ðæt hi ne magon ne ne cunnon, ðonne is him to ondrædanne ðæt him weorðe to lore ðæt hie to ryhtre tide gefolgian meahton, ðæt is se wisdom, ðe hie ær tide wilniað & eowiað, ac he him wyrð ðonne swiðe ryhtlice to lore. Hwæt hie magon geðencean ðæt fulga briddas, gif hie ær wilniað to fleoganne, ær hira feðra fulwe[a]xene sin, ðætte sio wilnung hie geniðrað ðe hi ær úpahefð, oð hie forweorðað. Eac hie sint to manigenne ðæt hie geðencen, gif men on niwne we[a]ll unadrugodne & unastiðodne micelne hróf & hefigne onsett, ðonne ne timbreð he no healle ac hryre. Eac [hi] sint to manigenne ðæt hi geðencen ðætte ða wif ðe ða geeacnodan bearn cennað ðe ðonne git fulborene ne bioð, ne fyllað hie nó mid ðæm hus ac byrgenna. For ðissum ðingum wæs ðætte Crist self, ðe swiðe
