On oðre wisan sint to manianne ða ðe eall orsorglice begitað ðisse worulde, ðæt ðæt hie wilniað; on oðre wisan ða ðe ðisses andweardan middangeardes wilna & welena wilniað, & swaðeah mid sumum wiðerweardum brocum hiora him bið færwirned. Ða ðonne sint to manienne ðe simle habbað ðisse worulde ðæt ðæt hie wilniað ðæt hie ne agiemeleasien, ðonne hi hit eall hæbben, ðæt hie ne secen ðone ðe him to eallum gefultumað, ðylæs hie lufigen ðás elðiodignesse ofer hiora ægenne eðel, & hior[a] mod eal ahon on ðæt ðe him her gelæned bið, & ðylæs hie gedwelle sio gehydnes & ða getæsu ðe hie on ðæm wege habbað, ðæt hie forgieten hwider hie scylen, & ðylæs hie for ðæm fægeran mónan ðe hi on niht gesioð forhycgen ðæs dæges bierhto & ðære sunnan. Eac hi sint to monienne ðætte hie nó ne geliefen ðætte ða willan & ða getæsu ðe him on ðisse worulde becumað, ðætte ðæt sien ða lean ðe him God getiohchod hæfð, ac bið ðissa iermða frofor, & ða lean bioð on ðæm ecean life ðæs ðe we to góde doð. Forðy we sculon ure mód getrymman wið ðisses middangeardes oliecunga, ðylæs we hie mid ealle mode lufigen, & us mid ealle hiere underðieden. Ac se se ðe ðas orsorgnesse ðe he her hæfð ne forswið mid ðære gesceadwisnesse his ingeðonces & mid ðære lufan ðæs beteran lifes, ðonne gehwierf(ð) he ða olecunga ðisse gewitendan worulde him to ecum deaðe. For ðissum ðingum wæs ðætte Ezechiel se witga ðreade Israhela folc, & cwæð ðæt hie wolden weorðan forlorene & oferwunnene mid orsorgnesse, swa swa Idumeas wæron, forðæm hi to swiðe bliðsodon on ðises middangeardes orsorgnesse. Ac Dryhten hie ðreade ðurh ðone witgan, ða he cwæð: Hie dydon min land him selfum to ierfelonde mid gefean & mid ealre heortan & mid ealle mode. Be ðæm wordum we mægon gehieran ðæt hie wæron swiðe suiðlice getælde, næs nó forðæmðe hie fægnodan, ac forðæmðe hie mid ealre heortan & mid ealle mode fægnodan. Be ðæm cwæð Salomon: Giongra monna dolscipe hi ofslihð, & dysigra monna orsorgness hi fordeð. Be ðæm iclan cwæð sanctus Paulus: Sien ða hæbbendan
25—2
