hi mid ðæm gehatum & mid ðæm tohopan anum hi spone to ðære giefe, ac eac mid ðære giefe he hi teach on ðone tohopan. Ðæt eac gecyðde se psalmsceop swiðe openlice, ða he cwæ(ð): He him sealde ricu oðerra kynrena, & manigra folca gestreones hie wieoldon, to ðon ðæt hi his ryhtwisnesse geheolden, & his ǽ sohten. Ac ðonne ðæt mennisce mód Godes glædmodnesse mid godum weorcum ne geandsworað, ðonne bið he swiðe ryhtlice mid ðæm gehined ðe mon wenð ðæt mid gearod sie. Be ðæm wæs eft gecweden ðurh ðone salmsceop: Ðu hie geniðrades, ða hi hi selfe úpahofon. Swa, ðonne ðonne unnyttan men ða godcundan gife nyllað leanian mid ryhtum weorcum, ac willað hi selfe her mid ealle fordon mid ðære fortruwunga ðæs toflowendan welan & orsorgnesse, & ðonon ðe hi utan bioð ahæfene, ðanon hie bioð innan afeallene. Be ðys ilcan wæs eac gecweden be ðæm welegan ðe gesæd is ðætte on hel(l)e ðrowude, hit wæs gecweden: Ðu óngfenge ðin god eal her ón worulde. Forðæm anfehð se yfla auht goodes on ðisse worulde ðæt he eft ðy maran yfles on ðæm toweardan life, gif he her nolde for ðæm goode to Gode gecierran. Angean ðæt sint to man[i]genne ða ðe ðises mid[d]angeardes wilna & we[o]lena wilniað, & him swaðeah sum wiðerweardnes his fo[r]wiernð, & hi geswencð on ðisse worulde, ða sint to manienne ðæt hie geornlice geðencen mid hu micelre giefe ofer him wacað se Scippend & se Stihtere ealra gesceafta, ðonne he hi nyle lætan to hiera agnum wilnungum; swa swa se læce, ðonne he ðæm siocan ne truwað, & wenð ðæt his gehelpan ne mæge, ðonne alief(ð) he him eal ðæt ðæt hine lysð to dónne & to ðycganne, ac ðæs ðe he wenð ðæt he gehelpan mæge, ðæm he forwiernð swiðe fe[o]la ðæs ðe he wilnað. Hwæt we eac wiernað urum cildum urra peninga mid to plegianne, ðæm ilcum ðe we eft tiochiað us to ierfeweardum to habbanne. Ac nimen him nú be ðisse bisene gefean & tohopan ðære ecan ierfeweardnesse, ða ðe sio wiðerweardnes ðisses andweardan lifes geeaðmet: ac gif hi God næfde on ecnesse getiochod to gehælanne, ðonne ne gebridlode he hi nó mid swa swiðlicre ðreaunga his lare. Eac sint to manigenne ða ðe ðissa hwilendlicra ðinga wilniað, & him ðeah sum broc & sumu wiðerweardnes hiera forwiernð, ðætte hie geornfullice geðencen ðætte oft ryhtwise menn mid ðys hwilendlican anwealde
