from Criste, & ure yfelu geðyldelice forbierð. Ac ðonne we onhyrigað Criste, & eac ða ónhyri[n]ge gefyllað, ðonne we lustlice sellað oðrum ðæt ðæt us God selð, & geðyldelice forberað hiora yfelu. Ða gesinhiwan mon sceal manian, & eac gehwelcne mon, ðæt hie nó læs ne ne geðencen hwæt oðre men him forberað & geðafiað, ðonne hie geðenceað hwæt oðrum monnum forberað; forðæmðe he mæg micle ðy ieð adreogan ða tionan ðe him oðre men doð, gif he wile gemunan ða ðe he oðrum monnum deð. Eac sint to manigenne ða gesinhiwan ðæt hi gemunen ðæt hie for nanum oðrum ðingum ne bioð gesomnode, buton forðæm ðæt hie sculon bearna strienan. Forðæm hi sculon geðencean, gif hie to oftrædlice & to ungemetlice hie gemengað on ðæm hæmede, ðæt hie ne bioð nó on ryhtum gesinscipe, gif hie ðæt on gewunan habbað, ac forðæmðe hie gewemmað ðone aliefedan gesinscipe mid ðære unliefedan gemengnesse, him is micel nie(d)ðearf ðæt hie mid oftrædlicum gebedum ða scylde adiligien. Forðæm wæs ðæt se getyda læce ðæs hefonlican læcedomes, ðæt wæs sanctus Paulus, ægðer ge ða halan lærde ge ðam unhalum læcedóm eowde, ða he cwæð: Gód bið men ðæt he sie butan wife. & eft he cwæð: Gód bið mannum ðæt ælc hæbbe his agen wíf, & ælc wíf hire ceorl, ðylæs hi on unryht hæmen. Ægðer he dyde, ge he egesode ða ðe on unryht hæmdon, ge he liefde ðæm ðe hit forberan ne meahton, forðæm ðætte ða ðe gestondan ne meahton, gif hi afealla[n] scolden, ðæt hi afeollen on ðæt hnesce bedd ðæs gesinscipes, næs on ða heardan eorðan ðæs unryhthæmedes. & eft he cwæð to ðæm untrumum: Agife se wer his wife hire ryht on hora gesinscipe, & swa same ðæt wif ðæm were. Ac æfterðæmðe he hwelcehwugu gerisenlice leafe dyde ðæm gesinhiwon hira willan to fremanne, he cwæð: Ne cweðo ic nó ðæt ðæt ic ær cwæð bebeodende, ac lærende & geðafigende. Ða he spræc gelicost ðæm ðe hit hwelchwugu syn wære, ða he cwæð ðæt he hit forgiefan wolde & geðafian. Forðæm bið sio scyld ðy hraðor gehæled, forðæmðe hio ne bið unliefedo, ac ðeah hio aliefedu sie, ne sceal hi mon to ungemetlice begán. Ðæt us getacnode Loth swiðe wel on him selfum, ða he fleah ðe biernendan ceastre Sodoman, & com to Segor, ða ne dorste he nawuht hrædlice út of ðære ceastre faran up ón ða muntas. Midðæmðe he fleah ða birnendan Sodoman, he getacnode ðæt we sculon fleon ðone unliefedan byrne ures lichoman. Sio heanes ðonne ðara munta ge-
