tacnað ða clænnesse ðære forhæfdnesse. Ða ðonne bioð swelce hi eardigen upp on ðæm munte ða ðe bioð gesponnene to gesinscipe, & ðeah ne bioð na gemengde buton ðonne hi wilniað bearn to gestrienanne. Ðonne hie stondað up on ðæm munte, ðonne ðæt flæsc nauht elles ne secð to ðæm oðrum buton tudor. Ðæt is ðæt mon stonde on ðæm munte ðæt ðæt flæsc ne sie flæsclice to ðæm oðrum gefæsðnod. Ac monige bioð ðara ðe hie gehealdað wið unryhthæmed, & swaðeah his agenra ryhthiwena ne brycð swa swa he mid ryhte sceolde. Loth for út of Sodoman to Segor, & ðeah ne com he nauht hraðe onuppan ðæm muntum. Swa, ðonne ðonne mon forlæt ðæt wyrreste lifm & ne mæg ðeah ðonne git cuman to ðæm betstan, ne ða forhæfdnesse gehealdan ðæs hean gesinscipes, ðonne bið ðæt swa swa Segor stodd on midwege betweox ðæm muntum & ðæm merscum ðe Sodoma on wæs. Sio Segor gehælde Loth fleonde. Swa deð sio Segor ðæs medemestan lifes: ða ðe hire to befleoð hio gehealð. Ac ðonne ða gesinhiwan hi gemengað ðurh ungemetlice unforhæfdnesse, ðær [ðær] hi ðone fiell fleoð ðære synne, ðonne magon hie ðeah weorðan gehælede suiðe ieðelice ður[h] forgiefnesse & ðurh gebedu, swa swa Loth funde ða lytlan ceastre, & hine ðærón wið [ðæt] fyr gescilde. Ðæt lif ðara gesinhiwena, ðeah hit ful wundorlic ne sie on mægenum weoruldwilnungum to wiðstondanne, hit mæg ðeah bion orsorglic ælcra wita. Forðæm cwæð Loth to ðæm engle: Her is an lytele burg swiðe neah, ðær ic mæg min feorh on generian. Hio is an lytel, & ðeah ic mæg ðæron libban. He cwæð ðæt hio wære swiðe neah, & ðeah genoh fæst on his hælo. Swa is ðæt lif ðara gesinhiwena. Nis hit naht feor ascaden from ðisse worulde, ne eac noht fremde ðære ecan hælo, forðæm for ðære dæde ðe h[i]e doð betwuh him hi beoð gefriðode mid oftrædlicum gebedum betw[u]h him, swelce hie sien on sumere lytelre byrig belocene. Be ðæm wæs swiðe ryhte gecweden ðurh ðone engel to Lothe: Ðinre bene ic wille nú onfón, & for ðinre bede ic ne toweorpe ða burg ðe ðu forespr[i]csð. Swa bið ðæt lif ðara gesínhiwena. Ne bið hit nó fordemed beforan Gode, gif ðær gebedo æfter fylgeað. Ymb ða illcan gebedo sanctus Paulus manode, & ðus cwæð: Ne fornime incer nóder oðer ofer will butan geðafunge, ðæm timum ðe he hine wille gebiddan, ac geæmtigeað inc to gebedum. Ongean ðæt sint to manigenne ða ðe ne beoð gebundne
