ðæt he ær dyde. Hit is awriten on ðæm godspelle ðæt nan mon ne scyle dón his hond to ðære sylg, & hawian underbæc. Ne ðon ma se ðe gehat gehæt, ne wene he ðæt he sie a ðy near hefonrice, gif he hine from went ðæm gehatum. Forðæm se ðe hine selfne maran godes behæt, & ðonne forlæt ða maran gód, & went hine to ðæm læssum, ðonne bið hit swutol ðæt he bið fromlociende oferswiðed.
LII. Ðætte on oðre wisan sint to manienne ða ðe gefandod habbað ðara flæsclicra synna, on oðre wisan ða ðe ðæs noht se cunnon.
On oðre wisan sint to manienne ða ðe ongietað & witon hiera lichoman synna, on oðre [ða] ða ðe hie nyton. Ða sint to manienne ðe hiera lichoman synna onfunden habbað, ðæt hie huru æfter ðæm scipgebroce him ða sǽ ondræden & ðæt forlor his frecennesse, ðonne hie hit oncnawen, ðæt hi hit ónascunigen; ðætte ða ða ðe mildheortlice bioð gehealdne æfter hiora ðurhtogenum synnum, ðætte hi eft unwærlice to ne gecierren, & ðonne swelten. Forðæm is gecweden to ðære syngiendan sawle, ðe næfre hire synna geswican nyle: Ðu hæfst forlegisse andwlitan, forðæm ðe no ne sceamiað. Ðeah hie sint to manienne ðæt hie geornlice giemen, ðeah hi ðæt gód hira gecynde gehal nolden ge-[h]ealdan, ðæt hi hit huru tobrocen gebeten. Him is ðearf ðæt hie geðencen hu micel menigu ðæra getreowfulra bið, ðe ægðer ge hi selfe clæne gehealdað, ge eac oðre of hira gedwolan ahwierfað. Ac hwæt cweðað hi ðonne, ðonne ða oðre stondað ón anwalgre hælo, & hie nyllað æfter yfelre dæde gecierran? Oððe hwæt cweðað hi, ðonne ða oðre briengað ægðer ge hie selfe ge eac oðre mid hiora bisenum to hefonrice; ond hie, ðonne him God ðone first alefð, & him hira yfel forbierð, nyllað furðum hie selfe briengan? Ac hie sint to manienne ðæt hie gemunen hwæt hi gódes ær forleton ðæs ðe hi don meahton, ðæt hi huru ðonne forbugen ðæt andwearde yfel. Be ðæm cwæð Dryhten to ðæm gewundedum modum ðurh Ezechiel ðone witgan, swelce he to Iudeum spræce, & he ðara gedonena scylda eft gemyndgade, forðæmðe he wolde ðæt hi sceamode ðæt hie eft on ðære oðerre worulde wæren únclæne, he cwæð ðæt hi hi forlægen on Egiptum on hira gioguðe: hi wæron ðær forlegene & ðær wæron gehnescode hiera
