wære, he eft us laðude to his hyldo. Ac swa swa we nu ði[s] reahton be eallum monnum, swa hit mæg æghwelc mon be him anum geðencean, forðæmðe æghwelc mon ðe his bebod & his forbod ongiet, he bið swelce he b[ef]oran him stonde, ærðæmðe he gesyngige. Ðonne giet he stent befora[n] him, ðonne he hine ne forhygeð, ac for his ege forbierð ðæt he ne syngað. Ac ðonne he forlæt his godnesse & his unsceaðfulnesse, & gecist unryhtwisnesse, & ða gefremeð, ðonne went he his hrycg to him. Ac ðeah ðonne giet him fylgð God, & him æfter cliopað, ðonne he hine monað æfter ðære gedonan scylde, & hine spænð ðæt he to him gecierre. Ða scylda he nyle gesion, & ðone fromweardan he ciegeð, & ðone greadan his arfæstnesse & his frofre he gebræt ongean ða ðe to him gecierrað. Ðonne we gehirað under bæc ðæs maniendes stemne, ðonne we to him gecierrað, ðonne ðonne he us ciegeð huru æfter urum scyldum, ðonne he us æfter cliopað, ðeah we ær nolden æfter his lare. Hit is cýn ðæt we ure scomigen, ðonne he us æfter cliopað, gif we us nyllað óndræden ðonne ða oðre swa hi ufor stondað ðonne ða oðre. Hi sint to manienne ðæt hi witen [swa] swa hie on hira stede gestondað swa him mare gescot & ma flana hiera feonda to cymð. Forðæm he ongit swa micle swiður him on feohtan swa he hine selfne untrumran gefred on his lichoman. Ac gif he ðonne ðæm wiðstent, ðonne ongit he swa micle maran sige ón him selfum swa he unieð wiðstod. Ac hie sint to manienne ðæt hie unablinnendlice ðara leana wilnigen, & lustlice ðæt geswinc ðæra costunga ðe hi ðrowiað hi forsion & geðolien, & buton tweon hi geliefen ðara leana; forðæm, gif hie geðenceað ðara gesælða ðe him ungeendode æfter ðæm geswincum becuman sculon, ðonne ðyncað him ðy leohtran ða geswinc ðe ofergan sculon. Hi sculon gehieran hwæt ðurh Essaias ðone witgan gecweden is, he cwæð: Ðis cwið Dryhten: Ða afyrdan, ða ðe behealdað minne ræstedæg, & geceosað ðæt ic wille, & minne freondscipe gehealðað, ic him selle ón minum huse, & binnan minum wealle, wíc & beteran noman ðonne oðrum minum sunum oððe dohtrum. Hwæt elles getac-
