scolde & trumlicre. Oft weorðað monige æfter ðæs lichoman scylde to Gode gecerred, & hi ðonne swa micle fæsðlicor gestaðoliað on godum weorcum swa hi hi selfe synnigran ongietað. & oft ða, ða ðe on clænnesse hiora lichoman gehealdenne habbað, swa swa hi læsse ongietad ón him selfum ðæs ðe him hreowan ðyrfe, swa swa hie swiður wenað ðæt him genog sie ón hira lifes clænnesse, ðonne hira mod ne beoð ónhæt mid nanre manunge ðære hreowsunga. Ðonon wyrð oft Gode leofre ðæt lif ðætte æfter his synnum ónæled bið mid hreowsunga ðonne ðæt clæne & ðæt únsceaðfulle for slæwðe & for orsorgnesse. Be ðæm cwæð ðæs Deman stemn, ðæt is Christ, be Marian ðære forlegisse: Hire sint forgifena swiðe manega synna, forðæmðe hio swiðe hreowsade. Ond ef[t] he cwæð: Mara gefea wyrð on hefonum for anum hreowsiendum ðonne ofer nigon & hundnigontig ryhtwisra ðære ðe him nan ðearf ne bið hreowsunga. Ðæt we magon swutolor ongietan & hræðor bi úrum agnum gewunan, gif we willað ongietan ðone dom ures agnes modes. Hwæt, we witon ðæt we ma lufiað ðone æcer ðe ær wæs mid ðornum aswogen, & æfterðæmðe ða ðornas beoð aheawene, & se æker bið ónered, bringð godne wæsðm ma we lufiað ðone ðonne ðone ðe stent on clænum lande, & bið unwæsðmbære oððe ungefynde corn bringð oððe deaf. Eac sint to manienne ða ðe ungefandod habbað ðissa flæsclicena scylda, ðæt hie ne wene for hira clænnesse ðæt hie sien beforan ðæm hirrum hadum, forðæmðe hi nyton ðeah hi sin behindan ðæm ðe læssan hades bioð, & hie wenað ðæt hie beforan bion scylen; forðæmðe on ðæm dome ðæs ryhtwisan Deman ónwent sio geearnung ðone had & ða geðyncðo. Hwa is nu ðæra ðe gesceadwis sie, to ðæm gleaw sie ðæt he swelces hwæt tocnawan cunne, ðætte nyte ðætte ón gimma gecynde carbunculus bið dio[r]ra ðonne iacinctus?, & swaðeah ðæt bleoh ðæs welhæwnan iacintes bið betera ðonne ðæs blacan carbuncules; forðæm ðæs ðe sio endebyrdnes & ðæt gecynd forwiernð ðæm iacinte, se wlite his beorhtnesse hit eft geiecð, & eft, ðeah ðe ðæt gecynd & sio endebyrdnes ðæs carbuncules hine upahebbe, his blioh hine gescent. Swa bið on ðisse menniscan gecynde manige on beteran hade & on læwedum girelan mid godum weorcum & mid ryhte life man oferðihð ðone munuchad, & ða oðre, ðe ðone hierran
