sien gewægde mid ðære hreowsu(n)ga]. Ne gedyde næfre se mildheorta Dryhten, ne an his mode ne gebrohte swelce hreowsunga, gif he hit æfter ðæm auht swiðe wrecan wolde. He gecyðde swiðe mildheortlie ðæt he him deman nolde, ða he gedyde ðæt hi him selfe ær beforan demdan. Be ðæm is awriten on ðæm feower & hundnigontigoðan psalme, hit is gecweden: Wuton cuman ær his dome andettende. & eft hit wæs gecweden ðurh sanctus Paulus: Ðær we us selfum demden, ðonne ne dem(de) us nó God. & eft hi sint to manienne ðæt hi swa hopigen to ðære forgifnesse ðæt hie for ðære orsorgnesse to únwærlice ne aslawien. Forðæm [oft] ðæt lytige dioful ðæt mód ðæt he mid ðære synne ascrenceð, ðonne he gesihð ðæt hit unrot bið for ðæm hryre his synna, ðonne forspenð he hit mid ðære wolberendan oliccunge. Ðæt wæs mid ðære biesene getacnod ðe Dinan gedon wæs Iacobes dohtor. Hit is awriten ðæt Dina wære út gangende sceawian ðæs londes wif. Ða hi ða geseah Sihhem, Emmores sunu ðæs ebreiscan, se wæs aldormon ðæs [londes], & ða gelicode hio him, & he hi genam niedenga, & hire mid gehæmde. & ða wæs his mod gehæft mid ðæm mædene, & he ða hi swa unrote oleccende to him geloccode. Ðonne gæð Dine ut sceawian ða elðiodigan wif, ðonne hwelces minnes mód forlæt his ægne tilunga, & sorgað ymb oðerra monna wisan, ðe [him] nauht to ne limpð, & færð swa wandriende from his hade & of his endebyrdnesse. Sihhem, ðæs landes ealdorman, geniedde ðæt mæden Dinan, ða he hie gemette swa wandrian. Swa deð se dioful ðæt mod ðæt he gemet ón unnyttum sorgum: he hit awiert. Sihhemes mod wæs ða gehæft to Dinan. Swa ðæt dioful, ðonne he gesihð ðæt mod ón ðæm ilcan unryhtan willan ðe he bið, & ðonne eft gesihð ðæt hit ðæs hreowsað, ðonne gebringð he beforan ðæs modes eagan idle orsorgnesse & tohopan, forðæm ðæt he him oftio ðære nyttwyrðan unrotnesse. Be ðæm wæs swiðe ryhtlice gecweden ðætt[e] Sihhem Dinan liðelice olehte, ða ða he hi geunrotsod hæfde. Swa deð ðæt dioful ðæm mode: hwilum he gedeð ðæt him ðyncð ðæt hit nan scyld ne sie ðæt ðæt he deð; hwilum he gedeð ðæt him ðyncð, ðeah hit scyld sie, ðæt oðre men hefiglicor syngien; hwilum he fortruwað to swiðe Godes mildheortnesse; hwilum him ðyncð ðæt he hæbbe fierst genogne tó hreowsianne. & ðonne ðæt beswicene mod ymb ðyllic ðencð, ðonne wyrð hit amierred from ðære incundan hreowe, to ðon ðæt hit nan
