god ne gemete, forðæm hit nan yfel ne hriwð. Ac hit wyrð swa micle swiður beswicen mid ðæm witum swa hit nu swiður gefihð on his yfelum. Ongean ðæt sint to manienne ða ðe ða g[e]ðohtan synna wepað, ðæt hie geornlice giemen on ðære degelnesse hira modes hwæðer him ðæt geðoht cume of færlicum luste, ðe of wilnunga & geðafunga, ðæt hie swa [ge]syngeden. Forðæm hit oft gebyreð ðæt ðæt mod wyrð gecostod of ðæs flæsces lustfulnesse, & ðeah ðæt mod wiðstent ðæs flæsces lustfulnesse, swa ðætte se ilca lust ðe hine geunrotsað on ðære degelnesse his modes hine eft gerotsat, gif he him wiðstent. Oft eac folgað ðæm mode swa grundleaslicu costung, & hit swa forswilgð, ðæt hit mid nanre wiðerweardnesse hire ne wiðstent, ac geðafigende folgað ðære costunga. Ðonne hit bið onstyred mid ðære lustbærnesse, & hit ónhagað to ðæm ðingum, ðonne forlæt hit hrædlice ða weorc ðæs inneran godan willan, ðonne hit onhagað to ðæm uterran. Ac ðonne ðæt gesihð se ryhta dóm ðæs ðearlwisan Deman, ðonne ne bið hit nó swa swa geðoht syn, ac swa ðurhtogen. Forðæmðe ðæt ðætte hine ne onhagode utane forð to brenganne mid weorcun, innane he hit geðafode, & ðurhteah mid ðy weorce ðæs fulfremedan willan. We habbað geascod from urum ærestan mæge Adame ðæt us is from him gecynde ðæt we ælc yfel on ðrio wisan ðurhtion: ðurh gespan, & ðurh lustfulnesse, & ðurh geðafunga. Ðæt gespan bið ðurh dioful. Sio lustbærnes bið ðurh ðone lichoman. Sio geðafung bið ðurhtogen ðurh ðone gæst. Se sætere, ðæt is se dioful, he hine spænð on wóh. Se lichoma hine ðonne him underðied mid ðære lustfulnesse, oððæt se gæst bið oferwunnen mid ðære lustfulnesse, ðæt he hit geðafað. Swa swa sio nædre on neorxna wonge, ærest hio lærde Euan on woh, & Eue hi hire underðiod(d)e mid lustfulnesse, swa swa lichoma. Ða wæs Adam, swa swa se gæst, ðurh gespan ðære næddran & ðurh Euan lustbærnesse oferswiðed, ðæt he geðafode ða synne. On ðæm gespane we magon ongietan ða synne, & mid ðære lustfullnesse we bioð genedode, & mid ðære geðafunge we bioð gebundne. Ac ða sint to manienne ða ðe ða geðohtan synna hreowsiað ðæt hie geornfullice giemen ón hwelce ðæra synna hie befeollen, forðæm ðæt hi mægen ongean ðæt be ðæm ilcan gemete hreowsian ðe hi on hira [inn]geðonce ongieten ðæt hie gesyngoden, ðylæs him to hwón hreowen ða geðohtan synna, oððæt hi hi fulfremmen. & swaðeah we hi scylen manian & bregean ðæt we hi
