on ormodnesse ne gebringen, ðylæs hi wyrs dón. Forðæm oft se mildheortaa Dryhten swiðe hrædlice ða geðohtan synna awegaðwihð, ðonne he him ne geðafað ðæt hi hi ðurhtion moten. Be ðæm he mæg witan ðæt hi bioð hrædlice forgiefene, ðonne he him ne geðafað ðæt hi to ðæm weorce becumen ðæt he him ðonne ðearlur deman scule. Be ðæm is swiðe we[l] gecweden ðurh ðone psalmsceop ón ðæm an & ðritigoðan psalme, he cwæð: Ic wille secgan ongean me selfne min únryht, Dryhten, forðæm ðu forgeafe ða arleasnesse minre heortan. Ða he hæfde befæst Gode his synna, ða he getiohchod æfde ðæt he him ondettan sceolde. Ða cyðde se witga hu ieðelice bið to forgiefenne sio geðohte synn, ða he cwæð ðæt hio him sona forgiefen wære swa he geðoht hæfde to biddanne he cwæð ðæt him wære ær forgifen. Forðæm sio synn ne wearð ðurhtogen mid nanum weorce, forðæm ne com seo hreowsung to nanre ðrowunge, ac sio geðohte hreowsung adrygð ða geðohtan synne of ðæm mode.
LIV. Ðætte on oðre wisan sint to monianne ða ðe (ða) ðurhtogenan synna wepað, & swaðeah ne forlætað; on oðre wisan ða ðe hie nó ne hreowsiað, & hie ðeah forlætað.
On oðre wisan sint to manienne ða ðe ða gedonan synna wepað, & hi ðeah ne forlætað; on oðre wisan ða ðe hi fo(r)lætað, & swaðeah nó ne hreowsiað. Ða sint to manienne ðe ða gedonan synna wepað, & hi swaðeah ne forlætað, ðæt hi geornlice ongieten ðæt hi ón idelnesse tiliað hi selfe to clænsianne mid ðy wope, ðonne hi eft mid unryhte life hie besmitað; swelce hi hi mid ðære hreowsunga to ðæm aðwean ðæt hi hi mægen eft afylan. Be ðæm is awriten ðæt se hund wille etan ðæt he ær aspaw, & sio sugu hi wil[l]e sylian ón hire sole æfterðæmðe hio aðwægen bið. Hwæt, se hund wile aspiwan ðone mete ðe hine hefegað on his breostum, & ðæt ilce ðæt he for hefignesse aspaw, ðonne he hit eft frit, ðonne gehefegað hine ðæt ilce ðæt hine ær gelihte. Swa bið ðæm ðe ða gedonan yfelu hreowsiað, ðonne hi ðæt yfel mid ondetnesse him of aweorpað ðætte hira modes innað yfele & hefiglice mid gefylled wæs, & ðonne eft fóð to ðæm ilcan & fætað in æfter ðære
