ondetnesse ðæt ilce yfel ðæt hi ær mid ðære ondetnesse & hreowsunga [út]awurþun. Swa ðet swin, ðeah hit aðwægen sie, gif hit eft filð on ðæt sol, ðonne bið hit fulre ðonne hit ær wæs, & ne forstent ðæt ðweal nauht, ðeah hit ær aðwægen wære; swa bið ðæm ðe his gedonan synna weþeð, & hi swaðeah ne forlæt: hefigran scylde & hefigran witum he hine underðiet, gif he hit ne forlæt. Forðæm he forhogde ða forgifnesse ðe he mid ðære hreowsunga begiten hæfde, forðæmðe he wealwode on ðæm gedrofum wætere; & ðæt ðæt he ær mid ðær[e] hreowsunga geclænsode he beforan Godes eagum eft afýlde. Be ðæm is eft awriten on Salomonnes bocum, hit is awriten: Ne eftga ðu ðin word on ðinum gebede. Ðæt is ðonne ðæt mon eftgige his word on his gebede, ðæt mon æfter his hreowsunga gewyrce ðæt he eft scyle hreowsian. Be ðæm is eac gecweden ðurh Essaias ðone witgan, he cwæð: Aðweað iow, ðæt ge sin clæne. Hwæt, se ðonne ne recð hwæðer he clæne sie, [ðe ne sie], se ðe æfter ðære hreowsunga hine ryhtlice & clænlice nyle gehealdan: ealne weg hi hi ðweað, & ne beoð hie næfre clæne, ðeah hi ealneg wepen; ealneg hi wepað, & æfter ðæm wope hi gewyrceað ðæt hi moton eft weapn. Be ðæm is gecweden ðurh sumne wisne mon: Gif hwa ón hand nimð hwæt únclænes, & hine æfter ðæm að[w]ihð, & ðonne eft [fehð] on ðæt icle ðæt he ær feng, hwæt forstent him ðonne ðæt ærre ðweal? Se bið aðwægen of unclænnesse, se ðe aðwihð mid hreowsunga his unclænnesse. Se ðonne gehrinð eft ðære unclænnesse ðe syngað æfter his hreowsunga. Ac ða sint to manienne ðe ða gedonan scylda hreowsiað, & hi ðeah ne forlætað, ðæt hi ongieten ðæt hie beoð beforan ðæs dieglan Deman eagum gelice ðæm monnum ðe swiðe eaðmodlice onginnað beforon ricum monnum, & him swiðe oleccað ða hwile ðe hi him beforan beoð, & eft, ðonne hi him beæftan beoð, ðonne doð hi him to demme & to fiondscipe ðæt ðæt hi magon. Hwæt is ðæt, ðæt mon hreowsige his synna, buton ðæt mon eowað Gode his eaðmodnesse & his treowa & his hiersumnesse? Oððe hwæt is ðæt, ðæt mon æfter his hreowsunga syngige, buton ðæt, ðæt he deð feondscipe & ofermetto & unhiersumnesse ðæm ilcan Gode ðe he ær olehte? Swa swa Iacobus sæde se apostol, ða he cwæð: Swa hwa swa wille bion ðisse worulde freond to ungemetlice, he bið gehaten Godes feond. Ða ðonne sint to manienne ðe ða [ge]donan scylda wepað, & [hi] swaðeah ne forlæ-
