beswicene. Ða ðonne sint to manienne ða mid færlice luste bioð beswicene, ðæt hi óngieten ðæt hi ælce dæg(e) beoð on ðæm gefeohte ðisses andweardan lifes. Ac ðæt mod ðætte ne mæg gesion ða flane ær hit sie gewundad, hit beðearf ðæt hit hæbbe simle ón honda ðone scield Godes eges, & him symle ondræde ða diglan gescotu ðæs sweocolan feondes, & hine wærlice healde ón ðære byrg his modes wið nihtlicum gefeohtum forðæmðe hi willað simle on ðistrum feohtan. Ac ðæt mod ðætte næfð singale sorge hit self to behealdanne, ðonne bið hit ón sume healfe open to wundianne; forðæm se lytega feond swa micle ieðelicor ðæt mod gewundað swa he hit ongiet nacodre ðære byrnan wærscipes. Forðy sint ða to manienne ða ðe mid hrædlice luste bioð oferswiðde, ðæt hie to georne ne giemen ðissa eorðlicena ymbhogena, forðæmðe hi ne magon ongietan mid hu ma(ne)gum unðeawum hi beoð gewundode, ða hwile ðe hi to ungemetlice smeagað ymb ðas eorðlecan ðing. Be ðæm sæde Salomon ðæt se mon sceolde cweðan, se ðe wæs slæpende gewundad: Hi me wundedon, & ic hit ne gefredde; hi ne drogon, & ic hit nyste; & sona swa ic anwoc, swa wilnode ic eft wines. Swa bið ðæt mod slæpende gewundad swa hit ne gefret, ðonne hit bið to gimeleas his agenra ðearfa. Ac ðæt mod ðætte bið mid unðeawum oferdrenced, hit ne mæg ongietan ða toweardan yfelo, ne furðum ða nát ðe hit deð. Hit mon drægð swa hit ne gefret, ðonne ðonne hit iernð on ða unaliefedan unðeawas, & hit swaðeah ne ónwæcneð to ðon ðæt hit eft ón ierne mid hreowsunga. Ac hit wilnað ðæt hit to ðon onwæcne ðæt hit mæge eft weorðan oferdruncen; forðæm, ðeah ðæt mod slæpe godra weorca, hit wacað hwæððre on ðæm ymbhogum ðisse worlde, & wilnað ðæt hit sie oferdruncen his agnes willan. Swa hit gebyreð ðæt ðæt mod slæpð ðæs ðe hit wacian sceolde, & wacað ðæs ðe hit slapan scolde. Be ðæs modes slæpe wæs [ær] awriten on ðære ilcan Salomonnes bec, hit wæs awriten ðæt hit wære swelce se stiora slepe ón midre sǽ, & forlure ðæt stiorroður. Ðæm stiorere bið gelicost se mon ðe óngemong ðisses middangeardes costungum & ongemong ðæm yðum unðeawa hine agimeleasað. Se deð swa se stiora ðe ðæt stiorroðor forliesð, se ðe forlæt ðone ymbhogan & ða geornfulnesse ðe he mid stioran scolde ðære sawle & ðæm lichoman. Se bið swiðe ónlic ðæm stioran ðe hi stiorroðor forliest ón sæ, se ðe forlæt ðone foreðonc his gesceadwisnesse
