ongemong ðæm bisegum ðisses middangeardes. Ac gif se stiora his stiorroðor gehilt, ðonne cymð he orsorglice to lande, hwilum ðeah óngean wind & ongean ða yða, hwilum mid ægðrum. Swa deð ðæt mód, ðonne hit wacorlice stiereð ðære sawle: sume unðeawas hit óf[er]trit, sume hit ær gesihð, & utan becierð; ðæt is ðæt hit ða gedonan unðeawas swincende gebete, & ða ungedonan foreðoncelice becierre, swa se stiora deð: suma ða yða he b[e]cerð mid ðy scipe, sume hit oferstigð. Ymb ðæt is eft gecweden on ðæm Salomones bocum ðe we hatað Cantica Canticorum be ðæm strengestan cempum ðæs uplican eðles, hit is gecweden: Hæbbe eower ælc his sweord be his ðeo for nihtlecum ege. Ðonne mon hæfð his sweord be his ðio, ðonne mon temeð his unaliefde lustas mid ðæm wordum ðære halgan lare. & sio niht getacnað ða ðistro ðære blindnesse urre tidernesse. Forðæmðe nan mon ne mæg on niht gesion hu neah him hwelc frecenes sie, him is ðearf ðæt he hæbbe his sweord be his hype. Swa sculon ða halgan weras simle stondan gearuwe to gefeohte wið ðæm lytegan fiend, forðæm hi him ondrædað ða frecenesse ðe hi ne gesioð. Be ðæm is eft gecweden on ðære Salomones bec ðe we hatað Cantica Canticorum, hit is gecweden: Ðin nosu is swelce se torr on Libano. Ðæt is ðæt we oft gestincað mid urum nosum ðæt we mid urum eagum gesion ne magon. Hwæt is elles getacnod ðurh ða nosu buton se foreðonc & sio gesceadwisnes ðara godena manna? Hwæt elles getacnað se hea torr on Libano buton ðone hean foreðonc & ða gesceadwisnesse ðara godena monna, ða sculon ongietan ða costunga & ðæt gefeoht, ærðæmðe hit cume, ðæt hi mægen ðy fæstor gestondan, ðonne hit cume? Forðæmðe ælc here hæfð ðy læssan cræft ðonne he cymð, gif hine mon ær wát, ær he cume; forðæm he gesihð ða gearwe ðe he wende ðæt he sceolde ungearwe findan. Him wære ðonne ieðre ðæt he hira ær gearra wende ðonne he hira ungearra wende, & hi ðonne gearuwe mette. Ongean ðæt sint to manienne ða ðe ær ðenceað to syngianne, & ymbðeahtiað, ær hi hit ðurhtion, ðæt hi óngiten mid foreðonclicre gesceadwisnesse ðæt hi ónælað ðearlran dóm wið him mid ðæm ðæt hi her ymb ðæt yfel ðeahtiað, ær hi hit dón, & hi beoð mid swa micle strengran cwide ðæs domes geslægene swa hi beoð fæstor gebundne mid ðæm bende ðæs yflan geðeahtes. Micle hrædlicor
