ðornas ðære idlan lufan ær úpatuge, unnyt he plantode ón hi ða word ðære halgan lare. Forðæm wæs eac ðætte sanctus Petrus ærest towearp ðæt ðæt he eft timbrede. Ðæt wæs ða ða he Iudeas nolde nan wuht læran hwat hi don scolden, ac him cidde, forðæmðe hi ær dydon, & ðus cwæð: Ðone Nazareniscan Hælend ðæt wæs afandon wér betwux eow on mægenum & tacnum & foretacnum, ðá worhte Dryhten ðurh hine óngemang eow, ðone ge beswicon ðurh unryhtwisra monna honda, & ofslogon & ahengon ðurh eower geðeaht, swa swa hit God et fruman wisse, & ðeah geðafode; se ilca God hine eft aweahte tó ónliesanne ða gehæftan ón helle. Forðæm him ætwát Petrus ða dæd ðe he walde, siððan hi óngeaten hiora wælhreownesse, ðæt hi wæren gedrefde & geeaðmedde, & ðe nytweorðlicor gehierden ða halgan lare, ðe hi ær wilnodon ðæt hi gehiran mosten. Ða andwyrdon him ða Iudeas, & cwædon: Hwæt magon we his nu don, broður Petrus? Petrus andswarode, & cwæð: Doð ærest hreowsunga, & weorðað siððan gefullwade. Ða edniwunge & ða lare hi swiðe hrædlice forsawen, ðær hi æer ne óngeten ðone hryre & ða toworpennesse hira wælhreownesse ðurh his ðreaunga. Gelicost ðæm ðe sancte Paule wæs, ða him ðæt leoht cóm of hefonum, & hine gebregde: næs him nó ða giet to gecweden hwæt he mid ryhte ðonon forð don scolde, ac him was gesæd hwæt he ær to unryhte dyde. Ac ða he swa gebreged ón eorðan feoll, & ascode, & cwæð: Hwæt eart ðu, Dryhten? ða was him swiðe hraðe geandwyrd: Ic eom se Nazarenisca Hælend, ðe ðu ehtst. & ða cwæð he: Dryhten, hwæt hætst ðu me don? Ða ondwyrde him Dryhten: Arís, & gong to geonre byrg; ðe mon sægð ðara hwæt ðu don scealt. Loca nu, hu Dryhten was sprecende of hefonum to his ehtere, & hine reade for his ærgedonan weorcum. Ærðæmðe he him sæde hu he hine for healdan sceolde, ða wæs gehroren sio upahæfenes Paules & eal ða weorc ðe he ðurh ða worhte. & sona æfter ðæm hryre ðære upahæfennesse he ongan timbran eaðmodnesse. Ða ða he wilnode lare æt Gode, ða gefeoll se egeslica ehtere to ðon ðæt he swa micle stranglicor arise swa he hefiglicor afeoll. Swa sint to teweorpanne ærest ða ðe nan god [ær] ne dydon ðurh ðreaunge of ðære heardnesse hiora yfelnesse, to ðæm ðæt hi sien eft on firste arærde & gestonden on ryhtum weorce; forðæm we ceorfað heah treowu on holte ðæt we hi eft uparæren on ðæm botle,
