edleanum. Ac ða dieglan yfel habbað ecne gewutan on ðæm godcundan Deman. Ac ða gód ðe hi openlice doð beforan monnum beoð fulneah swelce hi sien butan gewitnesse, forðæm hi næbbað ece gewitnesse. Ac hi habbað ece gewitnesse ðara yfela ðe hi diegellice doð, ðonne hi he[o]lað from monnum ðæt hi secggan scoldon, & secgað ðæt hi he[o]lan scoldon. Be swelcum monnum cwæð Dryhten ðæt hi wæren gelicost deadra manna byrgennum, ða bioð utan oft swiðe wlitige geworhte, & bioð innan swiðe fúle gefylde. Swa bioð ða ðe hira gód eowiað beforum monnum, & hira yfel helað oninnan him selfum: hi licettað, & woldon lician for manna eagum utane buton godum weorcum innane. Ac hi sint to manienne ðæt hi ne forsion ða gód ðe hi doð, ac wenen him maran mede tó ðonne hi wenað. To swiðe hi hi forsioð, gif hi him maran mede to ne wenað ðonne eorðlices lofes, & him ðær genog ðyncð. Hi sel(l)að wið to lytlum weorðe ðæt ðæt hi meahton hefonrice mid geby[c]ggan: sellað wið manna lofe. Be ðæm cwæð Dryhten ón his godspelle ðæt ðæt ware hira méd. Ac forðæmðe hi ðæt gód openlice doð, & ðæt yfel diegellice, hi tácniað mid ðæm ðæt men scylen onscunian ðæt ðæt hie degellice doð, & lufian ðæt hi openlice doð: for ðære bisene hi libbað ðeah oðrum monnum, & cwelað him selfum. Ongean ðæt sint to manienne ða ðe gód diegellice doð, & swaðeah on sumum weorcum geliccetað ðæt hi openlice yfel don, & ne reccað hwæt men be him sprecen, hi sint to manienne ðæt hi mid ðære licettunge oðrum monnum yfle bisene ne astellen, ðea(h) hi self teladon ðæt hi mid ðære licettunga oðre men ne dwellen ne him ne derigen, ðylæs hit sie ongieten ðæt hie lufigen hi selfe swiður ðonne hiora niehstan, swelce hi hie selfe drencen mid wine, & ðæm oðrum sellen attor. Ac ðonne hi ða yflan bisne openlice doð, & ðæt gód degellice, ðonne ne helpað hi mid oðrum ðara nauht hira niehstum, mid oðrum hi him deriað. Forðæm swa hwa swa hilð his godan weorc, forðæmðe he wile fleon idel gielp, ðonne ne læt he nanne oðerne æfter him on ða godan weorc, ðonne he nyle ða bisne oðrum eowian ðe he mid ryhte eowian sceal. He deð swelce he plantige treowu, & ceorfe of ða wyrtruman. Be ðæm cwæð Crist on his godspelle: Doð eower godan weorc beforan mannum, ðæt hi mægen weorðian eowerne Fæder ðe ón hefonum is. Ac swaðeah is awriten on ðæm ilcan bocum ungelic cwide ðissum, ðæt is ðæt he cwæð: Behealdað eow ðæt ge ne
