he him ondræde, ðylæs he weorðe upahæfen for his wordum; ðætte ðær ðær he oðer(ra) monna wunda lacnað, he self ne weorde abunden on úpahæfennesse for ðære giemeleste his hælo; ðæt he hine selfne ne forlæte, ðær he oðerra freonda tilige, & him self ne afealle, ðær ðær he oðre tiolað to ræranne. Forðæm oft ða cræftas & ða mægenu weorðas te færwyrde ðæm ðe hi hæfð, ðonne hi for hira giemeleste hie fortruwiað on ðæm cræftum se hi hæbbað, & hi nyllað iecan: ðonne weorðað hi him to færwyrde, forðæm simle ða cræftas winnað wið ðæm unðeawum. Ac ðæt mod oft olecð him selfum, & ðonne for ðære oleccunga forlæt ðone ege his selfes ymbeðances. Ðonne gerest ðæt mod hit orsorglice on ðære fortruwunga. Ðonne cymð se lytega sætere to ðæm slawan móde, & ateleð him eall ðæt he ær to gode gedyde, & geræc him ðonne to geleafsuman ðæt he sie se gesælgosta on eallum cræftum ofer ealle oðre men, oððæt he wyrð aðunden & upahæfen on his mode. Ond ðonne beforan ðæs ryhtwisan [Deman] eagum him wyrð ðæt gemynd ðæra mægena & ðæra cræfta to swiðe diopum seače, & he ðær ðonne swiðe hefiglice on gefield, forðæmðe he afelð beforan ðæm Gode ðe eaðmodnesse lareow is, ðonne he hine upahefe beforan him selfum for his cræftum. Be ðæm was gecweden ðurh Ezechiel ðone witgan, he cwæð: Astig eft ofdune ðonan ðe ðu wenst ðæt ðu wlitegost sie. Swelce he openlice cwæde: For ðæm wlite ðinra cræfta ðu wurde úpahæfen, & ðonan ðu wyrst geniððrad. Eft se ilca witga sæde bispell bi Hierusalem, & tælde ðæt mod ðe for his cræftum ofermodgede, ða he cwæð: Dryhten cwið to ðisse byrg: Ðu were fulfremed on minum wlite, & ða fortruwdes ðu ðe for ðæm, & forlæge ðe ðines ægnes ðonces. Ðonne bid ðæt mod úpahæfen for ðære fortruwunga his cræfta, ðonne hit for hiora geearnunga gilpð, & orsorglice fagnað ón him selfum. Ac ðurh ða fortruwednesse hit wyrð getogen to ðon ðæt hit wyrð forlegen ón ofermettum. Ærest se awiergda gæst hit lærð utane ðone gielp, oððæt he ingæð ðurh ða ofermetta, & hit siððan gebregð ón manegum unteawe. Be ðæm worde is to ðenceanne ðe he cwæð to ðæm burgwarum: Ge eow forlægon eowres ægnes ðonces. Ðæt is ðætte ðæt mod sona swa hit God forsihð, swa secð hit his agenne gielp, & gæderað him ðonne selfum to lofe eall ðæt gód ðæt him forgiefen was to Godes lofe; wilnað mid ðy to gebrædenne his ægen lof, & higað wið ðæs ðæt
