ac geðenc wærlice hwæt ðu eart; & ðeah ðu ðæt hehste ðurhfare, ne forgiet ðu ðeah ðæt ðu man eart, ac geðenc ðone bridel ðinre mettrymnesse swiðe geornlice on ðe selfum, ðeah ðu sie úp ofer ðine mæð ahæfen. Forðæm is micel ðearf ðæt we ures modes eagan gecerren to ðære sceawunga urre untrymnesse. Ðonne us fullicost oleccað ða cræftas & ða mægenu, ðonne is us micel ðearf ðæt we eaðmodlice ófdune anluten mid urum mode, & halwendlice geðencen ða gód ðe we forgiemeleasodon, næs ða we dydon; ðætte ure mod ðy fæstre & ðy strengre beforan Gode sie on ðæm cræftum for ðære eaðmodnesse ðe we hit mid gewundiað, ðonne we gemunað ure giemeleste. Forðæm oft se ælmiehtiga God fo(r)lét ðæt mod his gecorenra gesyngian on sumum lytlum ðingum, ðeah hi on manegum sien fullfremede, ðæt hi him ondræden, & murkien for hira unfullfremednesse, ðeah hi beor(h)te scinen on sumum wunderlicun cræftum; ðæt hi hi for ðæm miclum ðingum ne mægen to úpahebban, ða hwile ðe hi ne magon gebetan ðæt lytle; ðylæs hi dyrren ofermodgian for ðæm æðelestum weorcum, ða hwile ðe hi ne magon oferswiðan ða yteme[s]tan yfelu.
Loca nu, ðu goda wer Iohannes, hu fægerne & hu wlitigne monnan ic hæbbe atæfred, swa unwlitig writere swa swa ic eom. Ðær ic hæbbe geteht hwelc hierde bion sceal. To ðæm ic was gened mid ðinre tælnesse, et ic nu hæbbe manege men gelæed to ðæm stæðe fullfremednesse on ðæm scipe mines modes, & nu giet hwearfige me self ón ðæm yðum minra scylda. Ac ic ðe bidde ðæt ðu me on ðæm scipgebroce ðisses andweardan lifes sum bred geræce ðinra gebeda, ðæt ic mæge ón sittan oð ic to londe cume, & arær me mid ðære honda ðinre geearnunga, forðæmðe me hæf(ð) gehefegad sio byrðen minra agenra scylda.
Ðis is nu se wæterscipe, ðe us wereda God to frofre gehet foldbuendum. He cwæð ðæt he wolde ðæt on worulde forð of ðæm innoðum a libbendu wætru fleowen, ðe wel ón hine gelifden under lyfte. Is hit lytel tweo ðæt ðæs wæterscipes welsprynge is on hefonrice; ðæt is Halig Gæst. Ðonan hine hlodan halge & gecorene,
