Page:Murdered minstrel.pdf/15

15

Sall put me out till a new day,
Lang as I’ve siller for to pay,
The Landlord said, Ye’re rather rash,
To turn you out I canna fash,
Since ye’re so positive to bide,
But troth yese sit by the fire-side;
I tald ye else of beds I’ve naine,
Unoccupied, except bare ane;
In it, I fear ye winna lye;
For stoutest heart has aft been shy
To venture in within the room,
After the night begins to gloom;
For in it they can ne’er get rest,
’Tis haunted by a frightful ghaist;
Oursels are terrified a’ night,
Sae ye may chance to get a sight,
Like that which some o’ our fowk saw.
Far better till ye gang awa',
Or else ye’ll maybe rue the day,
Guide faith, quo’ John, I’m thinking sae;
Better into the neuk to sit,
Than fla’d, Gude keep’s, out o’ our wit;
Preserve us ever frae all evil,
I widna like to see the devil!
Whisht gowk, quo Thrummy, hand your peace
That sauna gar me quit this place;
Nor great nor sma, I ne’er did ill,
The ghaist nor deil my rest shall spill.
I will defy the meikle deil.
And a’ his warks I wat fu’ weel;
What the sorrow then maks you sae eery?
Fling by your fears, and come be cheery.
Landlord gin ye’ll mak up that bed,
I promise I’ll be verra glad,