6
If a body meet a body comin’ frae the toun,
If a body greet a body, need a body frown?
Every lassie has her laddie,
Nane, they say, hae I;
Yet a’ the lads they smile at me
When comin’ through the rye.
Amang the train there is a swain
I dearly lo’e mysel’;
But whare his hame, or what his name,
I dinna care to tell.
GLOOMY WINTER’S NOW AWA.
Gloomy winter’s now awa,
Saft the westlin breezes blaw,
’Mang the birks o’ Stanely shaw,
The mavis sings fu’ cheery, O.
Sweet the crawflowers early bell
Decks Gleniffer’s dewy dell,
Blooming like thy bonny sel’,
My young, my artless dearie, O.
Come, my lassie, let us go
O’er Glenkilloch’s sunny brae,
Blythely spend the gowden day,
Midst joys that never weary, O.
Tow’ring o’er the Newton woods,
Lav’rocks fawn the snaw-white clouds,
Siller saughs, wi’ downy buds,
Adorn the banks sae briery, O.
