'Wha looks to freits, my master dear,
It's freits will follow them;
Let it ne'er be said that Edom o' Gordon
Was daunted by a dame.'
But when the lady saw the fire
Come flaming owre her head,
She wept, and kiss'd her children twain,
Says, 'Bairns, we been but dead.'
The Gordon then his bugle blew,
And said, 'Awa', awa'!
This house o' the Rodes is a' in a flame;
I hauld it time to ga'.'
And this way lookit her ain dear lord,
As he cam owre the lea;
He saw his castle a' in a lowe,
As far as he could see.
Then sair, O sair, his mind misgave,
And all his heart was wae:
'Put on, put on, my wighty men,
Sae fast as ye can gae.
'Put on, put on, my wighty men,
Sae fast as ye can drie!
For he that's hindmost o' the thrang
Sall ne'er get good o' me.'
Then some they rade, and some they ran,
Out-owre the grass and bent;
But ere the foremost could win up,
Baith lady and babes were brent.
freits] ill omens. lowe] flame. wighty] stout, doughty.
