I canna tell, I winna tell,
I darena for your anger;
But secret love will break my heart,
If I conceal it langer.
I see thee gracefu', straight, and tall,
I see thee sweet and bonnie;
But oh, what will my torments be,
If thou refuse thy Johnnie!
To see thee in anither's arms,
In love to lie and languish,
'Twad be my dead, that will be seen,
My heart wad burst wi' anguish.
But, Jeanie, say thou wilt be mine,
Say, thou lo'es nane before me;
And a' my days o' life to come
I'll gratefully adore thee.
Beyond thee, dearie, beyond thee, dearie,
And O, to be lying beyond thee;
O sweetly, soundly, weel may he sleep
That's laid in the bed beyond thee!
Craigie-burn-wood.
[This is another version of Craigie-burn-wood which Burns sent to Thomson's collection.]
Sweet fa's the eve on Craigie-burn,
And blithe awakes the morrow;
But a' the pride o' spring's return
Can yield me nocht but sorrow.
I see the flowers and spreading trees,
I hear the wild birds singing;
But what a weary wight can please,
And care his bosom wringing?
Fain, fain would I my griefs impart,
Yet dare na for your anger;
But secret love will break my heart,
If I conceal it longer.
If thou refuse to pity me,
If thou shalt love anither,
When yon green leaves fade frae the tree
Around my grave they'll wither.
The Braes aboon Bonaw.
[Written and musie arranged by W. Gilfillan.]
Wilt thou go, my bonnie lassie,
Wilt thou go, my braw lassie,
Wilt thou go, say ay or nay,
To the braes aboon Bonaw, lassie?
Though Donald ha'e nae mickle fraise,
Wi' Lawland speeches fine, lassie,
What he'll impart comes frae the heart,
Sae let it be frae thine, lassie.
Wilt thou go, &c.
Wi' siller clasp I'll deck thy waist,
Wi' silken snood thy hair, lassie;
Thou'lt sleep 'twixt Donald and the wa',
On bed o' bent sae rare, lassie.
Wilt thou go, &c.
When summer days cleed a' the braes
Wi' blossom'd broom sae fine, lassie,
At milking sheel, we'll join the reel,
My flocks shall a' be thine, lassie.
Wilt thou go, &c.
I'll hunt the roe, the hart, the doe,
The tarmigan sae shy, lassie,
For duck an' drake I'll beat the brake,
Nae want shall thee come nigh, lassie.
Wilt thou go, &c.
For trout an' par, wi' canny care,
I'll wylie skim the flee, lassie;
Wi' sic like cheer I'll please my dear,
Then come awa' wi' me, lassie.
Wilt thou go, &c.
"Yes, I'll go, my bonnie laddie,
Yes, I'll go, my braw laddie;
I'll kilt my coats, I'll tent the goats,
On the braes aboon Bonaw, laddie.
"Gin thou'lt prove true thou's never rue
The love thou bear'st for me, laddie,
Ilk joy an' care wi' thee I'll share,
Until the day I dee, laddie.
Come awa', my bonnie laddie.
Come awa', my braw laddie
Come weel, come wae, I'll kilt and gae,
To the braes aboon Bonaw, laddie."
