In cam' her cousin Kate, when it was growing late,
She said, What's gude for an' auld man?
O wheit-breid and wine, and a kinnen new slain;
That's gude for an auld man.
Cam' ye in to jeer, or cam' ye in to scorn,
And what for cam' ye in?
For bear-bread and water, I'm sure, is much better—
It's ower gude for an auld man.
Now the auld man's deid, and, without remeid,
Into his cauld grave he's gane;
Lie still wi' my blessing! of thee I ha'e nae missing;
I'll ne'er mourn for an auld man.
Within a little mair than three quarters of a year,
She was married to a young man then,
Who drank at the wine, and tippled at the beer,
And spent mair gear than he wan.
O black grew her brows, and howe grew her een,
And cauld grew her pat and her pan;
And now she sighs, and aye she says,
I wish I had my silly auld man!
Go to Berwick, Johnnie.
[The old tune of "Go to Berwick, Johnnie," is usually sung to a nursery doggrel, beginning,
Go, go, go,
Go to Berwick, Johnnie;
Thou shalt have the horse,
And I shall have the poney.
The following verses are from Johnson's Museum, and are said to have been partly written by John Hamilton, music-seller, Edinburgh.]
Go to Berwick, Johnnie;
Bring her frae the Border;
Yon sweet bonnie lassie,
Let her ga'e nae farther.
English loons will twine ye
O' the lovely treasure;
But we'll let them ken,
A sword wi' them we'll measure.
Go to Berwick, Johnnie,
And regain your honour;
Drive them ower the Tweed,
And show our Scottish banner.
I am Rob the king,
And ye are Jock, my brither;
But, before we lose her,
We'll a' there thegither.
The Landart Laird.
[From Jamieson's Popular Ballads and Songs 1806.]
There lives a landart laird in Fife,
And he has married a dandily wife:
She wadna shape, nor yet wad she sew,
But sit wi' her cummers, and fill hersel' fu'.
She wadna spin, nor yet wad she card;
But she wad sit and crack wi' the laird.
Sae he is doun to the sheep-fauld,
And cleekit a wether by the spauld.
He's whirled aff the gude wether's slcn,
And wrapped the dandily lady therein,
"I downa pay you, for your gentle kin;
But weel may I skelp my wether's skin."
Lassie, lie near me.
[Old words to the tune of "Laddie, lie near me," with the exception of the substitution of "Lassie," for "Laddie."]
Lang ha'e we parted been,
Lassie, my dearie;
Now we are met again,
Lassie, lie near me,
Near me, near me,
Lassie, lie near me.
Lang hast thou lain thy lane;
Lassie, lie near me.
A' that I ha'e endured,
Lassie, my dearie,
Here in thy arms is cured;
Lassie, lie near me.
