that thei mowe redresse it and amende it. For thinges passed out of longe tyme from a mannes mynde or from his syght, turnen sone into forʓetynge; because that mynde of man ne may not ben comprehended ne withholden, for the freeltie of mankynde.
IX.
Bishop Pecock, Repressor of over much Blaming of the Clergy, Vol. I. 86.
(About A.D. 1450.)
evils of private judgment in religion.
Certis in this wise and in this now seid manor and bi this now seid cause bifille the rewful and wepeable destruccioun of the worthi citee and universite of Prage, and of the hoole rewme of Beeme, as y have had ther of enformacioun ynouʓ. And now, aftir the destruccioun of the rewme, the peple ben glad for to resorte and turne aʓen into the catholik and general faith and loore of the chirche, and in her[1] pouerte bildith up aʓen what was brent and throwun doun, and noon of her holdingis[2] can thrive. But for that Crist in his prophecying muste needis be trewe, that ech kingdom devidid in hem silf schal be destruyed, therefore to hem[3] bifille the now seid wrecchid myschaunce. God for his merci and pitee kepe Ynglond, that he come not into lijk daunce. But forto turne here fro aʓen unto our Bible men, y preie ʓe seie ʓe to me, whanne among you is rise a strijf in holdingis and opiniouns (bi cause that ech of
