¶ The v fable is of the foxe and of the catte /
Here is many folke / whiche auauncen
them and ſaye that they ben
wyſe and ſubtyle / whiche ben
grete fooles and knowynge no
thynge / As this fable reherceth
Of a foxe whiche ſom tyme mette with a
Catte / to whome he ſayd / My godſep / god
geue yow good daye / And the catte anſwerd /
my lord god gyue yow good lyf / And thenne
the foxe demaunded of hym / My godſep what
canſt thow doo / And the catte ſayd to hym /
I can lepe a lytyl / And the fox ſayd to hym /
Certaynly thow art not worthy to lyue / by cauſe
that thow canſt nought doo / And by cauſe that
the cat was angry of foxes wordes / he aſked and
demaunded of the foxe / And thow godſep what
canſt thow doo / A thouſand wyles haue I ſayd
the foxe / For I haue a sak ful of ſcyences and
wyles / And I am ſo grete a clerke / that none
maye begyle ne deceyue me / And as they were
thus ſpekyng to gyder the cat perceyued a knyght
comynge toward them / whiche had many dogges
with hym / and ſayd to the foxe / My godſep /