¶ The xxj fable is of the vylayne and of the yonge bole /
E whiche is of euylle and ſhrewd
kynd / with grete payne he may
chaſty hym ſelf / as it appereth by
this fable / Of a vylayne / whiche
had a yonge bole / the whiche he
myght not bynd / by cauſe that euer he ſmote
with his hornes / wherfore the vylayne cutte of
his hornes / ¶ But yet whan he wold haue bound
hym / the bole caſted his fute fro hym / in ſuche
wyſe that he ſuffred noman to come nyghe hym /
And whan the vylayne perceyued the malyce of
the bole / he ſayd to hym / I ſhalle chaſtyſe the
wel / For I ſhalle take the in to the bouchers
handes / And thenne was the bole wel chaſtyſed /
¶ And thus ought men to doo of the euylle /
curſyd & rebelles/ whiche doo no thynge but
playe with dees and cardes and to ruffule / Such
folke ought men to put in to the handes of the
boucher for to lede them to the galhows / For
better may no man chaſtyſe them / For with
grete payne may he be chaſtyſed / whiche fleeth
alle good werkes ond[errata 1] alle good felauſhip