GILL MORICE.
GILL MORICE was an Earl's son,
His name it waxed wide;
It was nae for his great riches,
Nor yet his meikle pride.
His face was fair, lang was his hair,
In the wild woods he staid,
But his fame was by a fair lady,
That liv'd on Carron side.—
"Where will I get a bonny boy,
That will win hose and shoon,
That will gae to Lord Barnard's ha',
And bid his lady come!
Ye maun rin this errand, Willie,
And maun rin wi' pride,
When other boys gae on their feet,
On horseback ye shall ride."
"O no! O no! my master dear!
I dare not for my life,
I'll no gae to the bauld Baron's
For to tryst forth his wife."
"My bird Willie, my boy Willie,
My dear Willie," he said,
"How can you strive against the stream,
For I shall be obey'd."
"But, oh, my master dear!" he cried,
"In green wood ye're your lane;
Gi'e o'er sic thoughts, I would ye red,
For fear ye should be ta'en."
