Rigs o' barley (1820)/The rigs o' barley
THE RIGS O' BARLEY.
It was upon a Lammas night.
When corn rigs are bonny,
Beneath the moon's unclouded light,
I held awa to Annie:
Tho time flew by wi' tentless heed
Till 'tween the late and early;
Wi' sma' persuasions she agreed,
To see me thro' the barley.
The sky was blue, the wind was still,
The moon was shinin' clearly;
I set her down, wi' right guid will,
Amang the rigs o' barley:
I kent her heart was a' my ain;
I lov'd her most sincerely;
I kiss'd her owre and owre again,
Amang the rigs o' barley.
I lock'd her in my fond embrace,
Her heart was beating rarely;
My blessings on that happy place.
Aman the rigs o' barley!
But by the moon and stars sae bright,
That shone that hour so clearly;
She ay shall bless that happy night,
Amang the rigs o' barley.
I ha'e been blythe wi' comrades dear,
I hae been merry drinkin'
I hae been joyfu' gath'ring gear,
I hae been happy thinkin:
But a the pleaures e'er I saw,
Tho' three times doubled fairly,
That happy night was worth them a',
Amang the rigs o' barley.
CHORUS.
Corn rigs, and barley rigs,
And corn rigs are bonny:
I'll ne'er forget the happy night,
Among the rigs wi' Annie.